«Romeo − Djýletta» − qos ǵashyqtyń qosyla almaǵan, baıansyz mahabbatyn sýretteıtin týyndy. Ýıllıam Shekspırdiń klassıkalyq túpnusqasyn negizge ala otyryp, fransýz kompozıtory, aqyn jáne ánshi Jerar Presgıýrvık týyndyny kóreremenge óleńmen jetkizedi.
Veronadaǵy aýqatty da bedeldi Montekkı jáne Kapýlettı áýletteriniń ejelden jaýlasyp kele jatqandyǵy týraly aıtylady. Alaıda eki otbasyndaǵy qaptaǵan qaqtyǵystarǵa qaramastan, mahabbattyń qudiretine baǵynǵan jastardyń bir-birine degen kirshiksiz sezimderi, asqaq armandary, bıik maqsatatary menmundalap turady. Qyz balasynyń ómirden óz ornyn taýyp, otbasyn qurýy ata-ana úshin úlken baqyt ekeni aıdan anyq. Osy oraıda anasy Djýlettany Verona aqsúıekteriniń biri retinde quda túsken Parıske uzatýdy uıǵarady. Alaıda júrekke ámir júrgen be? Birin-biri súıetin Romeo men Djýletta óz degenderinen bas tartpaı, kishkentaı shirkeýde Lorenso ákeıdiń ruqsatymen jasyryn nekege turady. Ekeýiniń keskileskenin estigen dostary Benvolıo men Merkýsıo odan áýlet abyroıyn tógip, satqyndyq jasaǵanyn jazǵyryp, Djýlettadan bas tartýyn ótinedi. Alaıda essiz ǵashyq Romeo endigi ómiri tek súıgen sulýyna arnalatynyn jetkizedi. Bul qaýeset tek dostaryna ǵana emes, dushpandarynyń qulaǵyna da jetedi. Kóńili Djýlettaǵa yntyq Tıbalt Romeodan kek alýǵa bel býady. Al dosy Merkýsıo onyń bul aram pıǵylyn boldyrmaýǵa kómekke kelip, ajal qushady. Ajalmen aıqasqan Romeo qanjarǵa jarmasyp, Tıbaltty óltirip tynady. Osy oqıǵalardyń tizbegin sút anasynan estigen Djýlettanyń bólesi Tıbalttyń ajal qushqanyna qaramastan, týysqanyn óltirgen kúıeýine degen mahabbaty sýymaıdy, qaıta arta túsedi. Oqıǵanyń sharyqtaý shegi de baıansyz mahabbattyń qurbanyna aınalǵan, qos ǵashyqtyń qyrshyn taǵdyry arqaý etedi. Súıgenine qosyla almaǵan Romeo ý iship kóz jumsa, mahabbat pen súıispenshilikke oryn taba almaǵan Djýletta óz-ózine qol jumsaıdy. Bir qyzyǵy, ómir men ólim arpalysqan sáttegi qos ǵashyqtyń qyr sońynan qalmaǵan ajal beınesi eki jastyń ózderine qol salýyna kómekke kelgendeı.
«Jalpy, «Romeo-Djýlettanyń» 25-ke tarta túri bar. Qoıylym qatty unady, kóńilimnen shyqty dep aıta alamyn. Men kórgen spektaklderdiń úzdigi desem qatelespeımin. Maǵan jastardyń energııasy, sahnada oınaý sheberlikteri unady», − deıdi fransýzdyq kompozıtor, mýzyka men lıbretto avtory Jerar Presgıýrvık.
Spektaklde 60 qa jýyq akterlardyń belsendi oınaýy men óz rólderin sátti alyp shyqqandyǵyn, sondaı-aq, sahnanyń bezendirilýi, jaryqtyń tań sáýlesindeı jarqyrap shýaq shashýy kórermenniń kóńilinen shyqqany sózsiz.
Aıta keteıik, Romeony – Salamat Muqashev, Djýlettany – Jarqynaı Shalqar, Parısti – Danııar Týranov, Merkýsıony – Aman Gýmarov, Benvolıony – Orazaly Igilik, Tıbaltty – Rasýl Ýsmanov, Sút ana rólin –Aınur Bermuhambetova, Ledı Montekkıdi – Láılá Temirhan, Ledı Kapýllettıdi - Aına Abdýkarımova, Graf Kapýletıdi – Daryn Shynybek, Lorenso ákeıdi – Berik Atahanov, Verona hanzadasyn – Altynbek Amankýlov, Aqyndy – Sultan Keńshilik, Taǵdyrdy – Alııa Djırenbaeva sátti oryndap shyqty.
Shyǵarmanyń qoıýshy rejısseri − Qazaqstannyń eńbek sińirgen qaıratkeri Ashat Maemırov, mýzyka jáne lıbretto avtory − Jerar Presgıýrvık, aýdarma jasaǵan − Gúlnara Salyqbaı, qoıýshy sýretshi − Qanat Maqsutov.
Aıman MUQYShEVA