Zań jobasy elektr energııasyn tutynýshylardyń quqyqtaryn qorǵaýǵa jáne energetıkalyq kásiporyndar kórsetetin qyzmetterdiń sapasyn qamtamasyz etýge baǵyttalǵan. Jobamen on bir zańnamalyq aktige, onyń ishinde «Salyq jáne bıýdjetke tólenetin basqa da mindetti tólemder týraly» kodeksine (Salyq kodeksi), Ákimshilik quqyq buzýshylyq týraly, Jer, Sý kodeksterine, sondaı-aq birqatar zańdarǵa túzetýler engiziledi.
Qujatta ıesiz dep tanylǵan elektr jelilerin energııa berýshi uıymdarǵa berý jáne olardy korporatıvtik tabys salyǵynan jáne múlik salyǵynan birjolǵa bosatý máseleleri retteledi. Elektr energetıkasy salasyndaǵy ýákiletti organnyń quzyreti naqtylanady.
Eksporttalatyn elektr energııasyn óndirýdiń ózindik qunynan tómen emes baǵa boıynsha jáne elimizdiń birtutas energetıkalyq júıesinde nemese onyń bólikterinde elektr energııasynyń profısıti jaǵdaıynda ǵana Qazaqstannan tys jerlerge satylatyn elektr energııasyna shekteý belgilenedi.
Elektr energetıkasy salasyndaǵy quqyq buzýshylyqtardyń elektr jáne jylý jelilerine qosýǵa arnalǵan tehnıkalyq sharttardy berýge qoıylatyn talaptardy buzý, sondaı-aq tehnologııalyq buzýshylyqtar týraly aqparatty berý jónindegi talaptardy buzý bóliginde jańa quramy engiziledi.
Senatorlar sondaı-aq «Qazaqstan Respýblıkasy men Qyrǵyz Respýblıkasy arasyndaǵy Tarıftik saıasat negizderin qosa alǵanda, temirjol kóligi kórsetetin qyzmetterge qol jetkizýdi retteý tártibin qoldaný týraly kelisimdi ratıfıkasııalaý týraly» zań jobasyn talqylady.
Qazaqstan men Qyrǵyzstan arasynda Sankt-Peterbýrgte 2016 jylǵy 26 jeltoqsanda qol qoıylǵan kelisim Tarıftik saıasat negizderimen birge temirjol kóligi kórsetetin qyzmetterge qol jetkizýdi retteıdi. Zań jobasyn qabyldaý temirjol kóligimen Qyrǵyzstanǵa qatysty tranzıttik júk tasymalyn quqyqtyq retteýdi qamtamasyz etedi.
Zań jobasy Palatanyń qaraýyna jiberildi.