Qazaqstan Prezıdenti memlekettik organdardyń qyzmetkerlerin Memlekettik qyzmetshi kúnine oraı ótkizilgen konkýrstaǵy jeńisterimen quttyqtady.
Nursultan Nazarbaev memlekettik qyzmettiń mıssııasy halyqqa adal qyzmet etý jáne elimizdiń ulttyq múddesin tıimdi qorǵaı bilý ekenin atap ótti.
– Memlekettik apparattyń úılesimdi jumysy myqty ári táýelsiz Qazaqstandy qurýǵa septigin tıgizdi. Búginde elimiz álemniń barlyq jetekshi reıtınginde senimdi túrde laıyqty oryndarǵa ıe bolýda. Ekonomıkanyń oń qarqyny saqtalýda, qoǵamdyq kelisim men birlik ornyqty qoldaýǵa ıe, – dedi Memleket basshysy.
Elbasy memlekettik qyzmetshiler elimizdi damytýǵa zor úles qosqanyn atap ótip, aýqymdy reformalardy iske asyrýda memlekettik apparattyń mańyzdy ról atqaratynyna nazar aýdardy.
Nursultan Nazarbaev Qazaqstannyń jahandyq básekege qabilettigin arttyrý turǵysynan memlekettik apparatty júıeli túrde transformasııalaý jónindegi sharalarǵa erekshe toqtaldy.
– Memlekettiń ashyqtyǵyn qalyptastyrý jalǵasýda. Memlekettik qyzmetter kórsetýdiń biryńǵaı provaıderi – «Azamattarǵa arnalǵan úkimet» memlekettik korporasııasy quryldy. Ortalyq jáne jergilikti atqarýshy organdardyń jetekshileri jyl saıyn halyq aldynda esep beredi, – dedi Qazaqstan Prezıdenti.
Sonymen qatar, Elbasy memlekettik qyzmettiń merıtokratııa jáne ashyqtyq qaǵıdattaryna negizdelgen jańa formatyn engizýdiń nátıjelerin atap ótti.
– Qyzmetkerlerge eńbekaqyny jumys nátıjesi boıynsha tóleý, sondaı-aq biliktilik pen kásibı qabiletti turaqty túrde arttyrý máselesi zań júzinde bekitildi. Qazaqstan memlekettik basqarý salasynda Ekonomıkalyq yntymaqtastyq jáne damý uıymy elderiniń qaǵıdattaryn engizýde. Memlekettik apparattyń turaqtylyǵy nyǵaıdy – memlekettik qyzmettegi aýys-túıister eki ese qysqardy. Basqa jumysqa aýysý 18 ese, al jumystan bosaý – eki ese azaıdy, – dedi Memleket basshysy.
Sońynda Qazaqstan Prezıdenti memlekettik qyzmetshilerdiń joǵary ádep normalaryn qatań saqtaýynyń mańyzdy ekenin aıtty.
– Básekege qabiletti memlekettik qyzmetti ornyqtyrmasaq, órkendegen Qazaqstandy qalyptastyrý jónindegi basty maqsatymyzǵa da qol jetkize almaımyz. Bul oraıda memlekettik qyzmetshiniń abyroı-bedelin saqtaý mańyzdy. Sizder reformalardyń bel ortasynda júrsizder. Elimizdiń tabysqa jetýi men gúldenýi kóp jaǵdaıda sizderdiń jemisti jumystaryńyzǵa baılanysty. Sizder aldaǵy ýaqytta da memleketke múltiksiz qyzmet etip, halqymyzǵa adal eńbek etetinderińizge senimdimin, – dedi Elbasy.
Áńgime barysynda Nursultan Nazarbaev kezdesýge qatysýshylardyń el ishinde júrgizilip jatqan reformalar men rýhanı jańǵyrýdyń negizgi baǵyttaryn iske asyrý barysy týraly pikirin bildi.
Kezdesýge Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Q.Qojamjarov, Respýblıkalyq bıýdjettiń oryndalýyn baqylaý jónindegi esep komıteti zań bóliminiń meńgerýshisi M.Ahmetov, Aqparat jáne kommýnıkasııalar mınıstrligi Memlekettik qyzmet kórsetýdi damytý jónindegi departamenttiń basqarma basshysy N.Bajaeva, Almaty qalalyq ishki ister departamenti jergilikti polısııa qyzmetiniń basshysy J.Baıkenov, Pavlodar oblysy Aqsý qalasy Evgenev aýyldyq okrýginiń ákimi T.Beısenbaeva, Jambyl oblysy Jýaly aýdany Kókbastaý aýyldyq okrýginiń ákimi apparatynyń is júrgizý bóliminiń basshysy M.Bekturǵanov, Aqtóbe oblysy Tilderdi damytý basqarmasynyń bas mamany N.Bertileýova, Pavlodar oblysy Sharbaqty aýdany Orlovka aýyldyq okrýginiń ákimi I.Gallıamova, Pavlodar oblysy Pavlodar aýdandyq máslıhaty apparatynyń basshysy V.Geıns, Prezıdent Ákimshiligi Strategııalyq ázirlemeler jáne taldaý ortalyǵy meńgerýshisiniń orynbasary J.Ereeva, Prezıdent Ákimshiligi Jalpy bóliminiń meńgerýshisi M.Jaqypov, Investısııalar jáne damý mınıstrligi Kadr jumysy departamenti dırektorynyń orynbasary E.Qapyshev, Almaty qalasy Qarjy basqarmasynyń basshysy A.Qudaıbergenova qatysty.