Bilimderin laıyqty qorǵaýda
«Atyraýda bıyl mektep bitirgen 4516 túlektiń 70 paıyzy UBT tapsyrýǵa ótinish berdi. Talapkerlerdiń alǵashqy legi Halel Dosmuhamedov atyndaǵy Atyraý memlekettik ýnıversıtetinde, Atyraý munaı jáne gaz ýnıversıtetinde jáne Maqat aýdanynyń Dossor kentinde bilimderin sarapqa saldy. «UBT-ny uıymdastyrý aıasynda 9 test ótkizý bólimshesi jumys isteıdi. Ekeýi – oblys ortalyǵynda, jeteýi – aýyldyq eldi mekenderde. Test ótkizýdiń ádildigin qamtamasyz etý maqsatynda ǵımarattar tıisti tehnıkalyq quraldarmen tolyq qamtyldy. Synaq tapsyrýdyń alǵashqy kúnine 1128 mektep túlegi qatysty. Bıyl oblysta 97 oqýshy «Altyn belgi», 81 oqýshy «Úzdik attestat» ıegeri atandy. Olardyń bári de óz bilimderin laıyqty qorǵap shyǵady degen senimdemiz», deıdi oblystyq bilim berý basqarmasynyń basshysy Nursáýle Saılaýova. UBT ortalyǵynyń №30 fılıal jetekshisi Aınagúl Dúısekenovanyń aıtýynsha, túlekterdiń synaq tapsyrý barysyn Bilim jáne ǵylym mınıstrliginen kelgen arnaıy ókilder men memlekettik komıssııa músheleri baqylaıdy. Alǵashqy lektiń qorytyndysy boıynsha eń joǵary baldy Atyraý qazaq-túrik lıseıiniń oqýshysy Nurjan Shyńǵys jınady. 128 suraqtyń durys sheshimin tapqan ol bilim synaǵyna tııanaqty daıyndalǵanyn aıtady. Munaıly aımaqta UBT 21-26 maýsym aralyǵynda ótedi. Atyraýdan – Baqytgúl BABASh
Joǵary kórsetkish, jaqsy kóńil kúı
Jambyl oblysynda ulttyq biryńǵaı testileýge qatysýshylar 7 pýnkt boıynsha emtıhan tapsyrdy. Iаǵnı, alǵashqy kúni 2190 bala ulttyq biryńǵaı testileýge qatysyp, nátıjesinde 442 bitirýshi 100-den joǵary ball aldy. Sondaı-aq, 21 maýsym kúni de testileýden 713 bitirýshi ótken bolsa, 130 balanyń 100-den asa ball jınaǵany belgili boldy. Eki kúndik nátıje boıynsha oblysta jalpy 2903 túlek UBT tapsyryp, barlyǵy 572 bitirýshi júzden joǵary ball ıelendi. Oblystyq bilim basqarmasynyń bas mamany Janna Qalybaeva testileýge oblystaǵy mektep bitirýshilerdiń 70 paıyzynyń qatysqanyn, sebebi ulttyq biryńǵaı testileýdi joǵary oqý ornyna baratyndar ǵana tapsyratynyn aıtty. Bul kúni myńdaǵan túlekterdiń bilim dárejesi aıqyndaldy. Eki kúndik qorytyndy boıynsha eki oqýshynyń úzdik bilim kórsetkenin de aıta ketý kerek. Mejeli ball bıyl 140 ekenin eskersek, soǵan jeteqabyl kórsetkish ıelengen bitirýshiler óńirdegi bilim básekesiniń joǵary kórsetkishi men naqty nátıjesine úles qosty. Jambyl aýdany Besaǵash aýyly Abaı atyndaǵy orta mekteptiń túlegi Aqbota Shadyhan 134 ball alsa, Taraz qalasyndaǵy №49 mektep-gımnazııanyń bitirýshisi Symbat Súıirhanova 133 ball deńgeıinde bilimin dáleldep shyqty. Testileý jumystary óńirde 25 maýsymǵa deıin jalǵasady. Qalǵan kúnderde de júzden júırik shyqqan bitirýshilerdiń kórinýi ábden múmkin. Búginde 134 ball alyp otyrǵan Aqbotanyń armany asqaq. Besaǵash aýylynda oqyp, sonda mektep bitirgen ol bir jyl boıy mektepten tys Taraz qalasyndaǵy «Dostyq» bilim berý ortalyǵynda bilimin jetildirgen eken. Sondaı-aq, jas túlek Elbasy Joldaýynda aıtylǵan bilim salasyna da aıtýly úles qosýdy óziniń maqsaty sanaıdy. «Bala kúnimnen otandyq medısınany damytý jolynda eńbek etýdi armandadym. Sonyń ishinde hırýrgııa salasy meni erekshe qyzyqtyrdy. Endi Qaraǵandy qalasyndaǵy Medısına akademııasyna oqýǵa túsip, bilimimdi ári qaraı damytsam deımin. Taǵy bir aıta keterligi, bıylǵy ulttyq biryńǵaı testileý jyldaǵydan ózgeshe boldy. Sebebi, árbir túlektiń ekinshi mamandyq tańdaýyna múmkindigi bar. Bul da jastardyń bilim básekesinde óz jolyn tabýyna septigin tıgizedi», deıdi A.Shadyhan. Tarazdan – Hamıt ESAMAN
136 ball jınady
Shyǵys Qazaqstanda UBT 20-24 maýsym aralyǵyna josparlanǵan. Oblystyq bilim basqarmasynyń usynǵan málimetterine júginsek, bıyl óńirde 8989 oqýshy mektep bitirip, onyń 7000-ǵa jýyǵy UBT tapsyrýǵa tilek bildirgen kórinedi. «Oblys boıynsha 20-22 maýsym aralyǵynda 3858 mektep bitirýshi UBT-ǵa qatysty. 20-21 maýsym kúnderi jalpy sany 2106 oqýshy (qazaq tilinde – 1102, orys tilinde – 1004) test tapsyrdy. Búgin 3 myńnan astam, erteń 420 oqýshy synaqtan ótedi dep josparlanǵan», deıdi oblystyq bilim basqarmasynyń mektepke deıingi jáne jalpy orta bilim berý bóliminiń bas mamany Ráýııa Halenova. UBT tapsyrylǵan úsh kúndegi eń joǵary ball О́skemen qalasyndaǵy daryndy balalarǵa arnalǵan mamandandyrylǵan oblystyq mektep-lıseı-ınternatynyń túlegi Rıza Bókeıhanovanyń enshisinde – 136 ball. Atalǵan bilim ordasynyń dırektory Aıgúl Abdýldına shákirtiniń bıologııa pánin tańdaǵanyn, Semeı men Astana qalasyndaǵy medısınalyq akademııanyń birine oqýǵa túspek oıy bar ekenin aıtty. UBT oblys ortalyǵyndaǵy eki joǵary oqý ornynda ótkizilip jatyr. О́ńirdegi Ulttyq biryńǵaı testileý ortalyǵynyń jetekshisi Saırash Iskakova S.Amanjolov atyndaǵy ShQMÝ-de 21 maýsymdaǵy alǵashqy lektegi testileý synaǵynyń sátti ótkenin, bul kúni 501 oqýshy test tapsyrǵanyn jetkizdi. О́skemennen – Azamat QASYM