Jyl saıyn ótetin forýmnyń ashylý saltanatynda Qazaqstan Respýblıkasynyń Memlekettik Hatshysy Gúlshara Ábdiqalyqova, "Astana EKSPO-2017" Ulttyq kompanııa" AQ basshysy Ahmetjan Esimov pen uıymdastyrý komıtetiniń tóraıymy Darıǵa Nazarbaeva sóz sóıledi.
Darıǵa Nazarbaeva dástúr boıynsha forým bıyl da qazirgi zamannyń eń ózekti problemalaryn talqylaıtynyn atap ótti. "О́kinishke qaraı, ondaı problemalyq jaǵdaılar azaıar emes. Qazirgi zaman qorqynysh pen basqarýǵa kelmeıtin erkindik kezeńi dep atalyp júr. Rasymen solaı ma? Jaqynda ǵana jahandanýdy progrestiń shyńy dep ataǵan edik. Al endi ol adamdardy" qorqyta bastady. Sebebi oǵan radıkalızm ıdeıasy, ultshyldyq, ıntegrasııalyq prosesterden bas tartý sekildi úrdister qarsy shyǵýda. Biraq kim jeńiske jetedi?", dedi Nazarbaeva.
Onyń aıtýynsha, terrorlyq aktiler, Taıaý Shyǵystaǵy azamattyq soǵys, bosqyndar sanynyń artýy Eýroodaq elderiniń keıbirine qıyn soǵýda. "Brıtan áleýmettanýshysy Zıgmýnd Baýman adamzattyń negizgi eki qundylyǵy bar ekenin durys atap ótken. Olar - erkindik pen qaýipsizdik. Ol ekeýi bir-birinsiz ómir súre almaıdy. Erkindigi joq qaýipsizdik - haos, al qaýipsizdigi joq erkindik - quldyq. Adamnyń jeke basynyń erkindigin qaýipsizdik úshin shekteý - qıyn dılema. Al qazirgi urpaq neni tańdaıdy?", dep surady Darıǵa Nazarbaeva.
Darıǵa Nazarbaeva atap ótkendeı, Aqparattyq-kommýnıkasııalyq tehnologııalardyń damý jyldamdyǵy kóptegen tarıhı qundylyqtar men stereotıpterge degen kózqarasymyzdy ózgertýi múmkin. Sebebi ol zamanýaı adamnyń oılaý júıesin basqasha qalyptastyrady. Al aqparattyq tehnologııalar álem elderiniń shekarasyn ashyp jatqany ras. Biraq sıfrlyq revolıýsııa men aqparattandyrýdyń sońy ne bolmaq? Adam ómiri qalaı ózgeredi? Eń úlken jetistik adamzatqa paıdasyn tıgize alady ma?", deı kele ol negatıv pen pessımızmnen aýlaq bolǵan jón ekenin aıtyp ótti.
"Biz jańa urpaqty myqty adam qylyp tárbıelep, tarıhı tragedııalardyń olardyń aıaǵynan shalýyna jol bermeýimiz kerek. Bizge jańa zamanda ata-babamyzdyń rýhanı qundylyǵyn boıyna sińire otyryp damyǵan urpaq kerek", deı kele, Darıǵa Nazarbaeva jýrnalıstik etıka máselesine de toqtalyp ótti. "BAQ - aqparatyq soǵystyń ótkir quraly. Biraq bul rette eń mańyzdysy - jýrnalıstik etıka. Al jýrnalıstik jolǵa túsken adamnyń maqsaty - halyqty aqparattandyrý, azamattardyń tanymyn keńeıtý. Osy joldy tańdaǵandar "Basqalarǵa zııan tıgizbeý kerekpin" degen qaǵıdany ustanýy kerek. Bul máselege medıa qaýymdastyqtarynyń pikiri qandaı? Men qoıǵan suraqtardyń barlyǵyna osy forým barysynda jaýap alamyz dep oılaımyn", dedi ol.
Esterińizge sala ketsek, EAMF 2002 jyly Darıǵa Nazarbaevanyń bastamasymen beısaıası ári kommersııalyq emes uıym retinde quryldy. Forým Batys pen Shyǵysty tolǵandyratyn kókeıkesti máselelerdi ashyq talqylaýǵa baǵyttalǵan. Atalǵan is-shara jyl saıyn álemniń 60-tan astam memleketinen halyqaralyq jáne qazaqstandyq BAQ ókilderin, saıasatkerler men sarapshylaryn bir alańǵa jınap keledi.
Gúlnur Qýanyshbekqyzy,
"Egemen Qazaqstan"
Sýretti túsirgen Orynbaı Balmurat,
"Egemen Qazaqstan"