Quryltaıdyń ashylý saltanatynda sóz sóılegen Elbasy Quryltaı álemniń túkpir-túkpirinde turatyn etnıkalyq qazaqtardyń kezdesýi men dıalog alańyna aınalǵanyn atap ótti.
"Men Dúnıejúzi qazaqtarynyń quryltaıyna qatysýshylardyń barlyǵyna "Qosh keldińizder!" deımin. Bul halyqaralyq sharaǵa 350-den astam delegat qatysýda. Olardyń barlyǵy qazir qaıda turatynyna qaramastan, olardyń tarıhı otany - Qazaqstan. Qaıda júrse de qazaqtyń tarıhı Otany bireý ǵana. Búgingi quryltaıǵa jas býyn da keldi. Bul olardyń óz tamyryn umytpaǵanyn kórsetedi. Ol úshin ata-analaryna alǵys bildiremin. Olar týǵan jermen baılanysty nyǵaıtyp, dástúri men tildi umytpaý úshin qoldarynan kelgenin isteýde", dedi Prezıdent.
Elbasy Quryltaıdy "Bolashaqtyń energııasy" taqyrybymen ótip jatqan Kórmemen tuspa-tus kelgenin atap ótti.
«Biz ádeıi osylaı oraılastyrdyq. Sebebi bul Qazaqstannyń mereıin asyryp, kúlli álemniń nazaryn aýdaratyn úlken shara bolyp otyr. Biz baýyrlarymyzdy Atajurtynyń búgingi kelbetin kórip, marqaısyn, oı túısin dep sizderdi EKSPO-ǵa oraı shaqyrdyq. Mynaý bar bolǵany on bes jyldyń ishinde boı kóterip, dúnıeni tańdandyratyn elordamyz», - dedi Nursultan Nazarbaev.
Quryltaı barysynda Memleket basshysynyń "Bolashaqqa baǵdar: rýhanı jańǵyrý" maqalasynda aıtylǵan ıdeıalary talqylanady dep josparlanýda. Sonymen qatar Quryltaı aıasynda Ulttyq akademııalyq kitaphanada belgili dintanýshy-ǵalymnyń 100 jyldyǵyna arnalǵan «Halıfa Altaı jáne tarıhtyń oralýy» atty halyqaralyq ǵylymı-tájirıbelik konferensııa ótedi. Din isteri jáne azamattyq qoǵam, Bilim jáne ǵylym, Aqparat jáne kommýnıkasııalar, Mádenıet jáne sport, Densaýlyq saqtaý mınıstrlikteri Quryltaıdyń sheteldik qonaqtarymen «dóńgelek ústel» otyrysyn uıymdastyrýdy josparlaýda. Sonymen qatar Quryltaı delegattary men qonaqtary «EKSPO-2017» halyqaralyq kórmesimen tanysyp, etnoaýyldy aralaıdy jáne «Astana Opera» teatrynda ulttyq mýzykamyzdyń altyn qoryna engen Evgenıı Brýsılovskııdiń «Qyz Jibek» operasyn tamashalaıtyn bolady. Quryltaı jumysyna barlyǵy 750 delegat pen qonaq qatysýda. Onyń 350-i álemniń 39 elinen keldi. Dúnıejúzi qazaqtary quryltaıynyń baspasóz ortalyǵynda 150 otandyq jáne sheteldik BAQ ókilderi aqparat taratýda.
Esterińizge sala ketsek, Dúnıejúzi qazaqtary quryltaıy 1992 jyldan beri ótkizilip keledi.
Gúlnur Qýanyshbekqyzy,
Sýretti túsirgen Erlan Omarov,
"Egemen Qazaqstan"