– Suńǵat, jýyrda Astanadan júldemen oralǵanyńdy jaqsy bilemiz. Jeńis qutty bolsyn! – Rahmet! Elordada halyqaralyq ekinshi BI Marathon uıymdastyryldy. Bul – qaıyrymdylyq marafony. Bes myńdaı adam qatysty. Úsh myńǵa jýyǵy – «BI Group» kompanııasynyń qyzmetkerleri. Úmitkerlerdiń eń egdesi – 74 jasta, eń kishisi – segiz jasta. Qatysýshylar 5, 10, 21 jáne 42,2 shaqyrymdarǵa júgirdi. Men 42,2 shaqyrymdyq qashyqtyqqa júgirgen 30-39 jas aralyǵyndaǵy sportshylar básekesinde máre syzyǵyn birinshi bolyp kestim. Kórsetkishim – 2 saǵat 40:43 mınýt. Bizdiń topta júzge jýyq adam óner kórsetti. Bul – meniń 10-ynshy marafonym. Klassıkalyq marafonnan alǵash ret júlde aldym. Kezekti bir bıiktikti baǵyndyrǵanyma qýanyshtymyn. Áıtpese, 6, 12 jáne 24 saǵattyq sýpermarafondarda baq synap, talaı márte oljaly bolǵanmyn. – Marafonmen qashannan beri áýestenip júrsiń? – Meni kóbi balýan retinde tanıdy. Erkin kúrespen aınalysqanmyn. Marafon – bala kúngi armanym. 2013 jyldan bastap ańsarym erekshe aýyp, alǵashqy marafonyma qatystym. Qatty unady. Sodan beri jarystarǵa qatysyp júrmin. Qazir marafon ómirimniń mánine aınaldy. Marafon – qashyqtyqty júgirip ótken qatysýshynyń barlyǵyna estelik medal beriletin jalǵyz sport túri. Ol adamdy ózin-ózi tárbıeleýge, salamatty ómir saltyn ustanýǵa úıretedi. Sondaı-aq, marafon arqyly álemniń kóptegen elin aralaýǵa múmkindik bar. Júgirý – eń tıimdi sport túri. Buǵan arnaıy aıaq kıimiń men nıet bolsa jetkilikti. Júgirýmen kez kelgen ýaqytta, kez kelgen merzimde, kez kelgen jerde aınalysýǵa bolady jáne ol jas talǵamaıdy. Marafonmen aınalysýǵa osynyń bári áser etken shyǵar dep oılaımyn. – Alǵashqy marafonyńdy qaı jerde júgirdiń? – Ony umytý múmkin emes. Alǵash ret Reseı Federasııasynyń Omby qalasynda uıymdastyrylǵan marafonda baq synadym. 42,2 shaqyrymdy esh qıyndyqsyz júgirip óttim. Maqsatym júlde alý emes, márege jetý edi. Sol oıymdy júzege asyrdym. Al odan keıingi ár marafonym qıynǵa tústi. Sebebi, nátıjeni jaqsartý úshin kúsh-qýatyńdy sarqa jumsaýǵa tıissiń. Búginge deıin 10 marafonda, toǵyz jartylaı marafonda baq synadym. Jeńip alǵan júldem de jeterlik. – Kún saıyn jattyǵasyń ba? – Iá. Kúnine 15-20 shaqyrym júgiremin. Jumystan keıingi aınalysar isim – júgirý. – Shákirtteriń bar ma? – Eki shákirtim bar. Abaı atyndaǵy orta mekteptiń oqýshylary Álimhan Qurmanǵalıev pen Janar Tóleýdi daıyndap júrmin. Ekeýiniń de aıaq alysy jaqsy. Áli 18 jasqa tolǵan joq. Sondyqtan, iri marafondarǵa qatysa almaıdy. Dese de, osy jyldyń 23 sáýirinde VI Almaty marafonynda óner kórsetti. 10 shaqyrymdy baǵyndyrdy. Osy jyldyń tamyz aıynda Reseıdiń Omby qalasynda uıymdastyrylatyn marafonǵa ózimmen birge Álimhandy da ala ketpekpin. – Áıgili Marat Jylanbaev sekildi Gınnestiń rekordtar kitabyna enerlikteı táýekelderge barý oıda joq pa? – Joq. Ol úshin qyrýar qarjy men motıvasııa kerek qoı. Biraq, bir armanym bar. Marafonnyń tarıhı otany – Grekııada júgirgim keledi. – Alda qandaı jarystar bar? – Shilde aıynda Astanada Qazaqstan chempıonaty ótedi. Ázirshe kúni naqtylanǵan joq. Sondaı-aq, tamyzda Reseıdiń Omby qalasyndaǵy marafonǵa qatysýdy josparlap otyrmyn. Osy eki jarysqa daıyndalýdamyn. – Áńgimeńe rahmet. Sáttilik serik bolsyn!
Áńgimelesken Farhat ÁMIRENOV, jýrnalıst Pavlodar oblysy, Aqtoǵaı aýdany