Qaraǵandy oblysynyń ákimi Erlan Qoshanovtyń qatysýymen ótken jıynda mańyzdy máseleler talqylandy. Qala Balqash kóliniń jaǵasynda ornalasqandyqtan, ondaǵy shaǵyn jáne orta kásiporyndar týrızm salasynda jumys isteıdi. Biraq sońǵy kezderi Balqashqa qatynaý qıyndap ketken.
- 2016 jyly Qaraǵandy-Balqash-Qaraǵandy baǵytyndaǵy temirjol quramy alynyp tastaldy,- dedi qala ákimi Aleksandr Aglıýlın. - Balqash qalasyna týrıster kóptep keletinin eskere, jáne qala turǵyndarynyń ótinishi boıynsha osy baǵyttaǵy quramdy qaıta qalpyna keltirý qajet. Jáne de Balqash-Máskeý baǵyty boıynsha tirkelmeli vagondy qosý qajet. Qysqy ýaqytta avtojol jabyq bolatyndyqtan, Qaraǵandy-Balqash-Qaraǵandy poıyzyna qosymsha vagondar qosý kerek.
Sonymen qatar qala ákimi Balqash áýejaıynyń («Jezqazǵan Eır» AQ bólimshesi) ushý-qoný jolaǵyn qalpyna keltýri kerektigin aıtty. Bul ushý-qoný jolaǵy QR Qorǵanys mınıstrliginiń balansynda. 2007 jyly jartylaı jóndeý jumystary jasalǵan.
- Balqash qalasyna, onyń ishinde EHRO men qalanyń 80-jyldyq mereıtoıyn ótkizý kezinde týrısterdiń kóptep kelýine baılanysty jáne jaǵajaı týrızmin damytý maqsatynda áýejaıdyń ushý-qoný jolaǵyna tolyq jóndeý jumystaryn júrgizý qajet,- dep qosty Aleksandr Aglıýlın.- Jáne de antıterrorlyq qaýipsizdikti kúsheıtý maqsatynda tekseris qurylǵylaryn ornatqan jón. Bul jóninde biz Azamattyq avıasııa komıtetine birneshe márte ótinishter joldaǵanbyz, alaıda ázirge esh nátıje bolmaı tur.
Sonymen qosa jıyn barysynda shaǵyn jáne orta bıznes máseleleri de talqylandy. Kóbine kásipkerler bankter kepildik múlik baǵasynyń tómen bolýyna oraı jobalar qarjylandyrylmaıtyndyǵana shaǵymdandy. Osy Balqash qalasy kásipkerleriniń basty máselesi.
- Aýyl sharýashylyǵy basqarmasyna Balqash qalasyn janyndaǵy aýyldarmen qosa Nátıjeli jumyspen qamtýdy jáne jappaı kásipkerlikti damytý baǵdarlamasy boıynsha «Qaraǵandy oblysynyń qarjylaı kómek qory» AQ arqyly nesıelendiriletinder tizimine engizýge qatysty hat joldandy. Bul aýylda otbasylyq jáne jeke bıznesti damytýǵa jol ashady,- dedi qala ákimi.
Osy oraıda aıta keteıik, «Balqash sút» kompanııasynyń ókilderi aýyl sharýashylyǵy óndirisi salasynda shıkizattyń jetispeýshiligine shaǵymdandy. Kásiporynnyń jobalyq qýattylyǵy 300 tonna sútti qaıta óńdeýge eseptelgen, alaıda búgingi kúni kásiporyn tek 30 tonna shıkizatty qaıta óńdeýde.
- Aýyl kooperatıvteri qaıda? Men únemi óndirýshilerden shıkizatymyzdy ótkizetin jerler joq degendi estımin. Al mynda kásiporyn qýattylyǵynyń tek 10 paıyzyn ǵana paıdalanýda,-dedi aımaq basshysy.-Men aýyl sharýashylyǵy basqarmasyna Shet jáne Aqtoǵaı aýdandary men Balqash qalasynyń ákimderimen, jáne de aýyl sharýashylyǵy óniderin óndirýshiler jáne qaıta óńdeýshilermen birlese jıyn ótkizýdi tapsyramyn. Mundaı máselelerdi talqylap, olardy sheshý joldaryn qarastyrý kerek.
Aımaq basshysy bul máselelerdiń barlyǵyn jete qaraýǵa ýáde berdi. Áýejaıdyń ushý-qoný jolaǵyn qalpyna keltirý boıynsha Qorǵanys mınıstrligimen kelissózder júrgiziletin bolady.