Osymen ekinshi ret uıymdastyrylyp otyrǵan etnofestıval bıyl joǵarǵy dárejede ótti. Qaz-qatar tigilgen on eki qanatty aqshańqan alpys úı sharanyń ajaryn kirgizip, kóshpendiler sherýi men at qulaǵynda oınaıtyn shabandozdardyń óneri jıylǵandardy tánti etti. Kókpar, aýdaryspaq, qyz qýý, asaýǵa tusaý salý syndy at oıyndary oınatylyp, ulttyq qundylyqtarymyzdyń dińgegi sanalatyn qolóner sheberleri men ustalardyń týyndylary, altybaqan, kúı tartys, qyran qus, qumaı tazy uly dalanyń rýhyn asqaqtatty.
«Basty maqsat – qazaqstandyqtar men shet eldik qonaqtarǵa kóshpendiler mádenıetin, qazaqtyń ejelgi tarıhy men salt-dástúrin kórsetý» – deıdi sharany uıymdastyrýshylar. Festıval aıasynda taqyrypqa baılanysty sektorlar jumys istedi. Máselen, «Almaly» atty qolónershiler aýylynda sheberlik sabaqtary ótkizilip, kórermender sheberlerdiń ónerin tamashalap qana qoımaı, mamannyń kómegimen sazdan qumyra jasap kórdi. Al «Shabyt» mýzykanttar aýylynda uıymdastyrylǵan baıqaýda qonaqtar túrli aspaptarda oınap, ulttyq taǵamdardan dám tatty. Qyz jasaýynyń qupııasymen tanysyp, kásibı búrkitshiler men palýandardyń ónerin tamashalady. Osylaısha, festıvalge kelgender kóshpendiler ómirin óz kózderimen kórip, turmys-saltymen tanysyp qaıtty. Kórermender arasynan «Eń ádemi ulttyq kıim» tańdalyp, syılyq tabystaldy.
Bir ereksheligi, qala irgesinde jalaýyn kótergen dýmandy merekeni kez-kelgen turǵynnyń tegin baryp tamashalaýyna tolyqtaı múmkindik jasalǵan. Qaladaǵy Ortalyq stadıon men «Astana» alańynan ár jıyrma mınýt saıyn arnaıy avtobýstar qatynap, Almatylyqtar men qala qonaqtaryn etnofestıvalmen qaýyshtyrdy. Ulttyq qundylyqtardyń qaınarynan qanyp iship, ejelgi Turan órkenıeti men kóne Túrkiler tarıhyna saıahat jasaýǵa kelgenderdiń sany jıyrma myń adamnan asyp jyǵyldy.
Arman OKTIаBR,
«Egemen Qazaqstan»
ALMATY