Jıyndy ashqan Ortalyq saılaý komıssııasynyń tóraǵasy Berik Imashev Senat depýtattyǵyna tirkelgen úmitkerlerdiń sońǵy tizimi aıqyndalǵanyn aıta kele, sózdi OSK saılaý prosesin uıymdastyrý jáne OSK músheleriniń qyzmetin qamtamasyz etý bóliminiń meńgerýshisi Maqsathan Anapınge berdi.
Onyń dereginshe, Senat depýtattyǵynan úmitkerlerdiń qatary – 38. Atyraý, Qostanaı, Qyzylorda, Pavlodar, Soltústik Qazaqstan oblystary men Almaty qalasynda bir orynǵa – úsh, al Aqmola, Aqtóbe, Jambyl, Shyǵys Qazaqstan, Batys Qazaqstan, Qaraǵandy, Mańǵystaý, Ońtústik Qazaqstanda eki kandıdattan tirkelipti.
– Saılaý naýqany elimizdiń «Saılaý týraly» Zańyna jáne Ortalyq saılaý komıssııasynyń qaýlysynda bekitilgen Parlament Senaty depýtattarynyń kezekti saılaýyn ázirleý jáne ótkizý jónindegi is-sharalardyń kúntizbelik josparyna sáıkes keledi. Daıyndyq barysynda Ortalyq saılaý komıssııasynyń músheleri óńirlerge qyzmettik saparmen baryp, daýys berý kúnine ázirlik barysymen tanysyp qaıtty. Saılaý naýqanyn uıymdastyrýshylar men qatysýshylarǵa kómek retinde ádistemelik qurylǵylar ázirlenip, onyń mátini Ortalyq saılaý komıssııasynyń saıtynda jarııalandy, – dedi Maqsathan Anapııauly.
Bıylǵy Senat depýtattaryn saılaýdyń ereksheligi – tańdaýshylardyń elektrondyq tirkeýdi de paıdalana alatyndyǵy. Bul jaıynda da tańdaýshylarǵa tolyqqandy aqparat berilgen.
Búginde oblystyq jáne Astana men Almaty qalalyq saılaý komıssııalary halyqaralyq jáne jergilikti baıqaýshylardyń tizimin alǵan. Olardy tirkeý jýrnaldary da daıyn tur.
Maqsathan Anapınniń aıtýynsha, daýys berý pýnktteri talapqa saı jabdyqtaldy. Daýys berý júrgiziletin ǵımarattarda órt qaýipsizdigi sharalary qatań saqtalýyna, jaryqpen, sýmen qamtamasyz etilýine basa mán berilip, saılaý bıýlletenderi qoıylǵan nysandarǵa arnaıy kúzet uıymdastyrylǵan.
Sonymen, 28 maýsymǵa taǵaıyndalǵan Parlament Senaty depýtattaryn saılaýǵa daýys berý Astana ýaqyty boıynsha saǵat 10.00-de bastalady. Barlyq aýmaqtaǵy daýys berý pýnktteri daýys berýge bir saǵat qalǵanda ashylýǵa tıis.
Qymbat TOQTAMURAT, «Egemen Qazaqstan»