Konferensııada belgili bolǵandaı, kórmede eriktiler retinde 46 memlekettiń ókilderi qyzmet etýde. Budan bólek, sharany halyqaralyq deńgeıde nasıhattaýda eleýli jumystar atqarylyp, búginge deıin 1,5 mlrd adam qamtylǵan, al kórme sońyna deıin bul kórsetkish 2,5 mlrd adamǵa jetpek. EKSPO-2017 jaıyndaǵy aqparat halyqaralyq iri áýejaılarda jáne ózge de mańyzdy nysandarda ornalastyrylýda. Sondaı-aq, «Google» kompanııasymen strategııalyq yntymaqtastyq iske asyrylyp, jarnamalar aldyńǵy qatarly álemdik telearnalarda kórsetilýde. EKSPO-2017 kórmesiniń saltanatty ashylýynan sheteldik BAQ-tyń 800-den astam ókili habar taratty. Kóptegen elderde bul shara tikeleı efırde kórsetildi», dedi «Astana EKSPO-2017» ulttyq kompanııasynyń basqarma tóraǵasy Ahmetjan Esimov.
Dúnıejúzilik konferensııada Astana ákimi Áset Isekeshev sóz sóılep, elordada balamaly energııa kózderiniń 50 nysany ornatylǵanyn baıandady. «Qalada balamaly energııa kózderiniń 50 nysany jumys isteýde. Mysaly, gúl beınesinde jasalǵan «Smart flower» kún energııasyn energııaǵa aınaldyratyn qural noýhaý boldy. Sonymen qatar, avtobýs aıaldamalary, baǵdarshamdar, tehnologııalyq oryndyqtar, parkter men skverlerdegi shamdar kúnnen qýat alady. Árıne, munyń barlyǵy shaǵyn jobalar ekeni belgili. Biraq bul jańasha oılaý úshin qajet, sondaı-aq iri jobalardy júzege asyrý úshin negizgi irgetas bolady. Biz iri jobalardy da júzege asyryp jatyrmyz», dedi qala basshysy.
Áset Isekeshev aldaǵy ýaqytta Astana kóshelerindegi shamdardyń energııa únemdeıtin shamdarǵa aýystyrylatynyn aıtty. «Aýqymdy túrde qaladaǵy shamdardy energııalyq jaǵynan tıimdi shamdarǵa almastyramyz. Sonymen qatar, kezeń-kezeńmen áleýmettik nysandarda – mektepterde, balabaqshalarda, aýrýhanalarda energııa únemdeýge baǵyttalǵan baǵdarlamalar júzege asyrylady. Energııa únemdeý ınstıtýtymen onyń tıimdiligin arttyrýǵa baǵyttalǵan keshendi jospar jasaldy. Al Ekologııalyq turaqtylyqty saqtaý úshin birqatar tómen kómirtekti jobany júzege asyrýdy josparlap otyrmyz. Onyń ishinde tómen kómirtekti kólikterge kóshý de bar», dedi ákim.
Elorda basshysynyń aıtýynsha, 2020 jylǵa qaraı Astana Eýrazııa keńistigindegi týrıster úshin eń tartymdy qala bolmaq. Sonymen qatar, ártúrli forýmdar men sammıtter, iskerlik kezdesýler men mádenı-sporttyq sharalar ótetin basty ortalyqtyń birine aınalýy tıis. Osy maqsatta áýejaı, temir jol vokzaly, qonaqúıler men basqa nysandar, biz sózben aıtqanda, ınfraqurylym sapaly ári jan-jaqty jetildirilip, damýda.
Ashat RAIQUL, «Egemen Qazaqstan»