Otyrysqa BUU Azyq-túlik jáne aýylsharýashylyq uıymy (FAO), BUU Saýda jáne damý konferensııasy (IýNKTAD), BUU-nyń Qorshaǵan orta jónindegi baǵdarlamasy (IýNEP), Ekonomıkalyq yntymaqtastyq jáne damý uıymy (EYDU), Standarttaý boıynsha halyqaralyq uıym (ISO), BUU Klımattyń ózgerýi boıynsha konvensııasy (RKIK) jáne DSU−ǵa múshe barlyq memleketterdiń ókilderi qatysty.
Keńesti asha otyryp, J.Aıtjanova osy jyldyń jeltoqsan aıynda Býenos-Aıreste (Argentına) ótetin 11-shi DSU mınıstrlik konferensııanyń qorytyndy kujattaryn zerdeleý maqsatynda saýda jáne qorshaǵan orta arasyndaǵy ekijaqty qarym-qatynastardyń mańyzyna toqtala kele, qatysýshylardy ashyq jáne belsendi pikirtalasqa shaqyrdy.
Otyrys barysynda DSU Hatshylyǵy ókiliniń DSU alańynda ótken kelissózder jaıly baıandamasy tyńdaldy. Júrgizilgen kelissózderdiń negizgi maqsaty balyqtardyń belgili túrlerin aýlaýǵa bólinetin qarajatqa tyıym salý jaıly kópjaqty kelisimderge kelý bolyp tabylady. Shamadan tys balyq aýlaýǵa jáne balyq aýlaýdyń deńgeıin arttyratyn, zańsyz, tirkelmegen jáne rettelmegen balyq aýlaýǵa bólinetin qarajatqa tyıym salynady dep kútilýde. Bul kelissózderdiń DSU músheleri arasynda belsendi talqylanyp jatqany jáne olardyń sátti aıaqtalýy DSU mınıstrlik konferensııasynyń eń mańyzdy nátıjeleriniń biri bolatyny atap ótildi.
Sonymen qatar, Avstralııa ókili ekologııalyq taýarlar jaıly plıýrırateraldyq kelisimge qol qoıý boıynsha kelissózder úderisi týraly qysqasha baıandama jasady. Kelisim ákelingen taýarlarǵa jáne jabdyqtarǵa qatysty kedendik bajdardy joıýǵa baǵyttalǵan. Bul, óz kezeginde, shaǵyn jáne orta bıznes sýbektileriniń «jasyl» tehnologııalarǵa qoljetimdiligin jaqsartady jáne jańartylǵan energııa kózderi aıasyndaǵy jobalardy damytýǵa qosymsha yqpal etedi.
Kezdesý barysynda FAO ókili Uıymnyń zańsyz, tirkelmegen jáne rettelmeıtin balyq aýlaýǵa qarsy kúres týraly jobalarymen tanystyrdy. Zańsyz balyq aýlaý máselesin qadaǵalaýdy jedel qolǵa alý qajettiligi DSU músheleriniń birqatar delegasııalary tarapynan qoldaý tapty jáne olar osy óndiriske balyq aýlaýdyń 30%-y nemese 10-23 mlrd AQSh dollary tıesili ekenin kóldeneń tartty.
Otyrysta taǵy bir mańyzdy másele – Parıj klımat kelisimin júzege asyrý úderisi qaraldy. RKIK ókili otyrysqa qatysýshylardy klımat boıynsha jalǵasyp jatqan halyqaralyq talqylaý barysymen tanystyryp ótti. Búgingi tańda 148 el Parıj kelisimin ratıfıkasııalady, endigi basty mindet ony iske asyrý jónindegi jumys baǵdarlamasyn pysyqtaý bolyp tabylady.
Osy segment aıasynda Koreıa Respýblıkasy, Jańa Zelandııa jáne Perý ókilderi Parıj kelisiminde kórsetilgen mindetterge qol jetkizý maqsatynda ortaq josparlaryn usyndy.
Qazaqstan delegasııasy otyrysqa qatysýshylardy Parıj kelisimin iske asyrý boıynsha óz bastamalarymen tanystyryp, Astanada «Bolashaqtyń energııasy» taqyrybymen EKSPO-2017 kórmesi ótip jatqanynan habardar etti. Sondaı-aq, delegasııa músheleri EKSPO-2017 sheńberinde «Energetıkanyń turaqty damýyn qamtamasyz etý» atty mınıstrlik konferensııasy ótip, onda «Jasyl» tehnologııalar men ınvestısııalardyń halyqaralyq ortalyǵyn Astanada ashý týraly sheshim qabyldanǵany týraly aqparatty da qatysýshylarǵa jetkizdi.
DSU-nyń Saýda jáne qorshaǵan ortany qorǵaý jónindegi komıtetiniń kezekti otyrysy qarasha aıyna josparlanyp otyr.
«Egemen-aqparat»