Atalmysh sharamen oraılas qalamgerdiń Qazaqstannyń Túrkııadaǵy elshiliginiń qoldaýymen túrik tilinde jaryq kórgen «Aqboz úı» («Arasat Meydan») romany men úlken jazýshy Ábish Kekilbaevtyń fılosofııalyq-psıhologııalyq astary tereń kesek týyndysy «Ańyzdyń aqyry» kitabynyń da («End of the legend») aǵylshyn tilinde aýdarylǵan nusqasynyń tusaýkeser rásimi qatar uıymdastyryldy.
Mereı jasqa tolyp otyrǵan qalamger Smaǵul Elýbaı 1947 jyly Túrikmenstan jerinde dúnıege kelgen. 1961 jyly áýletimen birge atajurtyna qonys aýdaryp, Almatydaǵy №12 orta mektepte oqyǵan. 1971 jyly QazMÝ-diń jýrnalıstıka fakýltetin bitirip, shyǵarmashylyq jolǵa túsken. Jazýshynyń shyǵarmasynyń basty ereksheligi – uzaq jylǵa sozylǵan otarshylyq buǵaýǵa degen qarsylyq, sonymen qatar qazaqtyń kóne tanymyn boıyna tereń sińirgen adam retinde shyǵarmalarynyń rýhanı-ulttyq boıaýy qanyq, jazý stıli qospasyz qazaqy.
Qalamgerdi qazaq ádebıeti atty shalqarǵa ákelip qosqan tólqujaty sııaqty týyndysy, árıne «Aqboz úı» romany. Bul týyndyda negizinen qýǵyn-súrgin, asharshylyq jyldary qazaq aýyldarynyń bastan keshirgen qıyn taǵdyr-talaıy sóz bolady. – Osy dúnıeni jazýǵa 30 jyl daıyndaldym, – deıdi jazýshy. Oqıǵalar soraby kókeıde ábden pisip, tolysqan shaqta bir shopannyń kıiz úıinde jatyp alyp jazyp shyqqan.
Kesh ústinde shyǵarmashylyq tulǵa jaıly aqjarma tilek aıtqan qoǵam qaıratkeri Myrzataı Joldasbekov, «Smaǵul óte oıshyl, bappen sóıleıtin jáne kóptiń kókeıindegi dúnıeni taýyp aıtatyn suńǵyla adam» dese, Memlekettik syılyqtyń laýreaty jazýshy Ánes Saraı, jazýshynyń shyǵarmasyn oqyǵanda ondaǵy oqıǵalar kózge elestep otyrady, bul ekiniń birinde kezdese bermeıtin sheberlik, onyń kınematografııaǵa tez boı urýy osy qabiletinen ekenin erekshelep aıtty.
Akademık Ǵarıfolla Esim jalpy qazaq ádebıetiniń ulttyq-ıdeologııalyq mańyzy jaıly oı qozǵap, «Qazaq sovet ádebıeti» jáne «Qazaq ádebıeti» atty eki uǵymnyń arajigin anyqtaıtyn ýaqyt jetkenin atap ótti. Basqosýdy túıindeý úshin minbege kóterilgen fılologııa ǵylymdarynyń doktory Tursyn Sydyqov myrza kesh ıesiniń jazýshylyq sheberligi men onyń shyǵarmalaryndaǵy – keleli oılar, túıindi tolǵamdar, salt-dástúr, ulttyq qundylyqtarǵa baı sıpaty qalamgerdiń adamı buljymas dińgegi ekenin, ásirese, qazaq kıno óneri kınodramatýrgııada atqarǵan eńbekteri el men halyq tarabynan laıyqty baǵasyn alýy tıis degenge toqtaldy.
Beken Qaıratuly, «Egemen Qazaqstan»