Atyna zaty saı, Alǵyr dese, alǵyr. 2016-2017 oqý jylynda jetken jetistikteri úshin Alǵyr Sálmenbaevpen oqý-bilim jolyn tańdaǵan daryndy dostary Aıdana Ádilseıitova, Polına Kan, Ásııa Tilektesova, Bogdan Protasovtarǵa Pavlodar qalalyq ákimdigi «Saryarqa juldyzdary» músini men noýtbýk syıǵa bergen-di. Ustazdary Tánzıla Mokroýsova, Lıdııa Shmıdt, Tatıana Sıgakova jáne Manat Áýbákirovany shákirtteri maqtan etedi.
– Árıne, testileýge tııanaqty, óte jaqsy daıyndaldyq. Mektebimizdiń ustazdaryna, anama rahmet! Bizge únemi jaǵdaı jasap, test tapsyrýdaǵy bir sátte taǵdyryma jol ashatyn úlken múmkindikke qol jetkizýge qoldaý kórsetti. Únemi oqý-bilimge, izdenýge ýaqyt bóletindikten osyndaı nátıjege jettim dep oılaımyn, − deıdi Alǵyr.
Anasy Sáýle de ulynyń júzden júırik shyqqan bilimdiligine qýanyshty. Kishkentaı kúninen alǵyr, zerek ósken uly mektepte oqyǵan kúnnen bastap-aq bilimge degen qushtarlyǵymen kózge túsipti.
− Joǵary ball alǵany − órkenıetti bilimge degen umytylysy, Alǵyr únemi kóp bilýdi maqsat etedi. Test tapsyrar sátke deıin daıyndyǵyn úzgen emes. Ol óz bilimine, óziniń daıyndyǵyna sendi, − deıdi anasy Sáýle.
Iá, bilimdige óris keń. Alǵyr endi Almaty men Astanadaǵy joǵary oqý oryndarynyń biriniń stýdenti atanatyn da kún de alys emes.
Izdenis demekshi, Alǵyr qalalyq mektepterdiń úzdik oqıtyn basqa oqýshylary sııaqty oblystyq, respýblıkalyq ǵylymı jobalar saıysyna jıi qatysyp keldi. Bolashaqta matematık ǵajaıyptaryn sheship, bilim-biligin ǵylym arqyly shyńdamaq.
Farıda BYQAI, «Egemen Qazaqstan»
PAVLODAR