Bıyl jetinshi ret ótkizilip otyrǵan sharany EUÝ kásipodaq komıtetiniń tóraǵasy Talǵatbek Janaıdarov, «Juldyz» jýrnalynyń bas redaktory, aqyn Ulyqbek Esdáýlet, belgili telejýrnalıst Nurtileý Imanǵalıuly, «Aıqyn» gazetiniń bas redaktory Nurtóre Júsip jáne professor-ǵalym Namazaly Omashev quttyqtaý sózben ashyp, jarysqa qatysýshylarǵa sáttilik tiledi.
Jyldaǵy dástúr boıynsha jarysqa qatysýshylar alpys jastan asqan qalamgerler jáne alpys jasqa deıingi jýrnalıster men BAQ salasynyń qyzmetkerleri bolyp eki topqa bólindi. Nátıjesinde alpys jastan asqandar arasynan I oryndy EUÝ oqytýshysy, zań ǵylymdarynyń doktory, professor Jumabek Busyrmanov ıelense, II oryndy Qazaq radıosynyń ardager jýrnalısi Ǵalym Esensarıev aldy. III oryn belgili telejýrnalıst Nurtileý Imanǵalıulyna buıyrdy.
Alpys jasqa deıingiler arasyndaǵy ekinshi toptan birinshi oryndy kórnekti fotograf Shúkir Shahaı jeńip alsa, ekinshi oryndy tanymal jýrnalıst Serik Janbolat, úshinshi oryndy Nurdilda Oraz ıelendi. Sondaı-aq, erekshe oıyndarymen kózge túsken Nesip Júnisbaı, Ulyqbek Esdáýlet, Ǵalym Omarhan jeńiske degen umtylystary úshin marapattaldy.
Týrnır sońynda uıymdastyrý alqasy barlyq qatysýshylarǵa alǵys aıtyp, estelik sýretke tústi. Osyndaı sharalar arqyly ár qazaqtyń jadynda Aqseleý Seıdimbekteı arda azamat árdaıym saqtalary sózsiz.
«Egemen-aqparat»