Jahandaǵy jaǵdaıdy baqylasaq, keı memleketterdiń tehnologııasy qaryshtap damyp, ekonomıkasy órlep turǵanymen, rýhanııat máselesi aqsap, ol óz kezeginde sol eldiń erteńine úlken qaýip tóndirip turǵan jaǵdaılar az emes. Belgili ǵalym Aqseleý Seıdimbek aǵamyzdyń qaıbir jyldary «Astana aqshamy» gazetine bergen suhbatynda bylaı degen edi: «Qazaq halqy halyq bolyp tarıh sahnasyna shyqqaly zorlyq pen qorlyqtyń, soǵys pen soıqannyń, aldaý men arbaýdyń, ashtyq pen apattyń, genosıd pen repressııanyń ultty joıýǵa baǵyttalǵan nebir sumdyqtaryn kórip baqqany belgili. Sonyń bárine de qazaq halqy tótep berip, óziniń ulttyq bet-beınesin – tilin, dilin, dinin, salt-dástúrin, rýhanı mádenıetin, moraldyq-etıkalyq normalaryn saqtaı alǵan halyq edi. Jáne bul qundylyqtar óziniń birtutas monolıtti qalpymen qazaq ultyn uıystyrýǵa, ulttyq bolmystyń bir bútin bolýyna qyzmet etetin, sóıtip áleýmettik qatynastardyń barlyq deńgeıleri men barlyq tıpterine birdeı tegeýrindi yqpaly bolatyn. Túptep kelgende, qazaq halqyn tarıhtyń qylkópirinen aman alyp shyqqan qudiret te osy qundylyqtar edi». Aqparattyq soǵystyń alańynda qarýymyz da, qorǵanymyz da ulttyq rýhanııatymyz ekenin Elbasymyz naqtylap kórsetip berip otyr. Prezıdentimiz Nursultan Nazarbaev óz maqalasynda: «Jańa turpatty jańǵyrýdyń eń basty sharty – sol ulttyq kodyńdy saqtaı bilý. Onsyz jańǵyrý degenińizdiń qur jańǵyryqqa aınalýy op-ońaı» dep atap kórsetkenindeı, rýhanı jańǵyrý basqanyń emes, óz bolmys-bitimimizge tereń úńilýmen iske asady dep bilemin. Dál osy rette aıta keteıin. Mysaly, motıvasııanyń syrtqy jáne ishki dep ekige bólinetinin bilemiz. Alǵashqy túrine qarjylaı kómek kórsetý, salmaqty mártebe berý, maqtaý, marapattaý, taǵysyn taǵylardy jatqyzamyz. Al onyń ekinshi túri, adam belgili bir dúnıelerdi ózi ishteı qalap turady. Biraq ol úshin saǵan eshkim aqsha tólemeıdi, maqtamaıdy, biraq sen ony óz erkińmen isteısiń, odan taǵy lázzat alasyń. Aıtaıyn degenim, endigi jerde Memleket basshysynyń mańyzdy bul bastamasyn iske asyrý maqsatynda adamdardyń ishki motıvasııasyn qalaı damytamyz degen saýalǵa basty nazar aýdarǵan durys dep oılaımyn.
Azamat BITAN, PR mamany, bloger