Elbasynyń rýhanı jańǵyrý jónindegi jalpyulttyq ıdeıasynda eskiniń eselenip jańarýy, burynǵynyń búgingimen ushtasýy sııaqty úlken murattar jatqany aıtylǵan. Bizdiń tarıhymyz ben tamyrymyz tilimiz, dástúrimiz, dinimiz, ónerimiz tikeleı baılanysty. Halqymyzdyń ǵasyrlar boıǵy ózimen birge jasasyp kele jatqan erekshe qasıetteri búgingi kúni dáriptelip, jarqyrap jaryqqa shyǵýy – eldiktiń nyshany, rýhanı jańǵyrý.
Osy oraıda Aqparat jáne kommýnıkasııalar mınıstrligi men «Qazaqstan» ulttyq arnasy birlesip uıymdastyryp otyrǵan atalmysh joba qolǵa alyndy. Asa bir yjdaǵatpen bastalǵan ıgi sharaǵa halyqtyń alary da, bereri de kóp. Qazynaly Qaraǵandyda ótken is-sharaǵa qurmetti qonaq bolyp, «Qazaqstan RTRK» AQ basqarma tóraǵasy Erlan Qarın qatysty. Keshtiń joǵary deńgeıde uıymdastyrylǵanyna baǵa bere kelip: «Men qazaqpyn» mega-jobasy – «Qazaqstan» ulttyq arnasy úshin óte mańyzdy joba. Osy arqyly biz ulttyq mádenıetimiz ben rýhanııatymyzdy qaıta túletemiz. Onymen qosa, shalǵaıdaǵy óner ıelerine úlken sahnaǵa jol ashylady. Oblystarda irikteý maýsym aıynyń basynan bastaldy. Búginge deıin jobaǵa 428 úmitker qatysyp, onyń 40-y jeńimpaz atandy. Jobanyń halyqaralyq atalý sebebi – shilde aıynda irikteý Reseıde, Mońǵolııanyń Baıan-О́lgeı aımaǵynda, Qytaıdyń Altaı ólkesinde ótedi dep josparlaýdamyz. Efırge qyrkúıek aıynan shyǵa bastaıdy. Al aqtyq jarysty Táýelsizdik merekesi qarsańynda, jeltoqsan aıyna josparlap otyrmyz», – dedi tóraǵa.
Belgilengen erejege sáıkes, munda 18 ben 40 jas aralyǵyndaǵy úmitkerler úsh kezeń boıynsha óner jármeńkesinde baqtaryn synady. Termeshilik, kúıshilik jáne ánshilik (dástúrli) óner saıysyna oblysymyzdyń aýdandary men qalalarynan barlyǵy 36 ónerpaz qatysyp, onyń ishinen úsheýi mega-jobanyń respýblıkalyq kezeńine joldama aldy.
Mega jobanyń oblystaǵy irikteý kezeńin ótkizgen oblys ákimdigi, oblystyq «Qazaqstan-Qaraǵandy» telearnasynyń erekshe daıyndyǵy kórermenderdiń kóńilinen shyqty. Saryarqany saltanatqa bólep shyqqan sal-serilerge sahna tórinen aqshańqan úı tigip, Qazybek bı babanyń ataly da bataly sózimen sharanyń shymyldyǵy túrildi. Bul jerde Qaraǵandy qalasynyń mádenıet maıtalmandary men mýzeı qyzmetkerleriniń de eńbekterin erekshe atap ketken jón. Táttimbet atyndaǵy qazaq ult aspaptar orkestri, «Sholpan» úlgili bı ansambli bastaǵan ónerpazdar kesh boıy talmaı án salyp, qoshemetshil dýdy tań-tamasha etip otyrdy.
Sonymen, qara qyldy qaq jarǵan qazylar, atap aıtqanda jobaǵa arnaıy Astana qalasynan at shaldyrǵan Qazaqstannyń mádenıet qaıratkeri, dástúrli ánshi Nurjan Janpeıisov, Qazaqstannyń eńbek sińirgen qaıratkeri, Q.Baıjanov atyndaǵy konserttik birlestiktiń Táttimbet atyndaǵy qazaq ult aspaptar orkestriniń konsertmeısteri Bolathan Tashımov, Qazaqstannyń mádenıet qaıratkeri, halyqaralyq jáne respýblıkalyq án baıqaýlarynyń jeńimpazy Dáýrenbek Árkenov jáne respýblıkaǵa tanymal aıtysker aqyn Tilegen Ádilov saıysqa tórelik etti.
Olar ádil baǵa boıynsha, «Men qazaqpyn» jobasynyń respýblıkadaǵy dodasynda Qaraǵandynyń namysyn termeshilerden Nurmuhammet Baısúgirov, kúıshilerden Balqan Smaǵulov, al dástúrli ánnen Ánýar Adambaev qorǵaıtyn boldy.
Mıras ASAN, «Egemen Qazaqstan» Qaraǵandy oblysy