«Eliktedi, úlgi etti» deıtindeı otbasynda áskerı adam bolmaǵan Baqtııar bala kezinen áskerı bolýdy armandap ósti. Taǵdyr bala kezgi balaýsa tilegin qabyl etip, 2016 jyly Almaty oblysynyń Tekeli qalasynda ómirge kelip, orta mektepti bitirgen ol Almaty qalasyndaǵy Qurlyq áskerleriniń Áskerı ınstıtýtyn 4 jyl oqyp bitirip shyqty. Leıtenantty basshylyq Aqtaý qalasyna qyzmetke jiberdi. B.Nurmuqash kelgen boıda 25744 teńiz jaıaý áskeri áskerı bólimine teńiz jaıaý áskeri vzvod komandıri bolyp qyzmetke kiristi. О́z mamandyǵyn súıetin jáne azamat retinde óz Otanynyń qorǵany ekenin jaqsy túsinetin Baqtııar qıyn da qyzyqty jumysqa bilek sybana aralasty. Vzvodtyń ózine júktelgen tapsyrmalary men mindetterin múltiksiz oryndaý jolynda naǵyz áskerı qyzmetshige tán izdendi, jumystandy, áreket etti. Nátıjesinde, ol basqarǵan vzvod 2017 oqý jyly qysqy oqý merzimi qorytyndysynda taktıkalyq sabaqtar boıynsha synaq tapsyrýda úzdik shyqty. Bul vzvodty bir adamdaı daıyndap, ortaq iske jumyldyra alǵan komandırdiń – qyzmetke endi kirisken leıtenanttyń eńbeginiń jemisi ekeni anyq. Áskerı qyzmetshilerdiń barlyǵyna birdeı páter máselesin jedeldete sheshý múmkin bolmaǵandyqtan, olardyń páter jaldaý aqysyn tóleýdi memleket óz moınyna alǵan bolatyn. B.Nurmuqash da osy shapaǵattyń jemisin kórip júrgenderdiń biri. Eki apam, bir qaryndasym bar – degen leıtenant otbasyndaǵy jalǵyz ul bolyp shyqty. Kúlip qoshtasqan jas ofıserge qazaq úshin «shańyraqtyń ıesi» er balanyń orny bólek ekenin eskerip, «bir basynyń ekeý bolýyna» jáne beıbit elimizdiń berik qorǵany, tynysh kúnniń sarbazy bolýyna tilek bildirdik.
Gúlaıym ShYNTEMIRQYZY, «Egemen Qazaqstan»
Mańǵystaý oblysy