Álemge «Daıdıdaý» dep án saldyrǵan

Bastan-aıaq jandy daýysta ótken «Bastau live show» konsertin dúnıe júzi tamashalady desek artyq aıtqanymyz emes. Zaldaǵy halyqtyń 30-40 paıyzy Qytaı, Reseı, AQSh, Eýropa elderinen kelgen. Ásirese, «Dımashı, Dıma­shı» dep aıqalaǵan qytaılyq jankúıer qyzdardyń daýysynan qulaq tunady.

Álemge «Daıdıdaý» dep án sal­dyrǵan Dımash áýeli sahnada júz dombyrashymen birge áýelete kúı tartyp, jurtshylyqty bir ser­piltti. Onymen birge sahnada Qazaq­stannyń eńbek sińirgen ártisi, tanymal opera ánshisi Maıra Muhamedqyzy, Qytaıdyń áıgili ánshisi Terrı Lın, Eurovision-2012 jeńimpazy Lorın (Shvesııa), Uly­brıtanııa ánshisi Sofı Elıs Bekstor óner kórsetti. 

Bes bólimnen turatyn konsert barysynda Dımash Qudaıbergen túrli obrazda án salyp, akterlyq qyrymen de tanyldy. Olaı deıtin se­be­bimiz, pop mýzykanyń gúli re­seı­lik Krıstına Orbakaıtemen bir­ge dýet quryp, sahnada alǵash ret teatr­landyrylǵan kórinis usyndy.

– Kezinde «Slavıan bazary-2015» án baıqaýynda Dımash­qa úlken tabys ákelgen án – «Metel». Án bıiktigin, bolmasa daýys dıapazonyn tanytý maqsat emes. Krıstına Orbakaıte – bul ánniń alǵashqy oryndaýshysy. Osy sebepti de shyǵarmashylyq ujymmen aqyldasa kele dýet qurýdy oılastyrdyq, – deıdi, Dımashtyń ákesi, ári prodıýseri Qanat Aıtbaev.

Sheteldik jankúıerleriniń de jaıyn oılastyrǵan Dımash Qudaıbergen keshte «SOS d’un terrien en détress», «All by myself» sııaqty tanymal ánderdi oryndap, tórt tilde sharyqtata shyrqady. 

– Álemniń túkpir-túkpirindegi tyńdarmandarymnyń basyn qosyp, konsert ótkizý armanym edi. Búgin meniń sol armanym oryndaldy – dep tebirengen Dımash kópshilikti kóńildi otyrýǵa shaqyrdy.

Mádenıet jáne sport mınıstr Arystanbek Muhamedıuly ánshini Eýropany tańqaldyrǵan Ámire Qashaýbaevtyń jalǵasy dep atady.

– «Bulaq kórseń, kózin ash» deıdi dana halqymyz. Elordamyzdaǵy EKSPO-2017 kórmesi aıasynda ótip jatqan saltanatty keshke qosh keldińizder. Tarıhymyzda óner sańlaqtary jeterlik. Sonaý Úkili Ybyraı, Birjan sal, Aqan serilerdiń izin jalǵap, Eýropany tańqaldyrǵan Ámire Qashaýbaev, «álem Fıgarosy» atanǵan Ermek Serkebaev, qazaqtyń bulbuly Bıbigúl Tólegenova, Álibek Dinishev sekildi sańlaqtarymyzǵa álem qol soqty. О́nerdegi osy bir dástúrdiń jalǵasyndaı bolǵan Dımash úshin barlyǵymyz qýanyshtymyz, – dedi A.Muhamedıuly.

Sol arada taǵy bir bilgenimiz Dımashqa Qytaı, AQSh, Eýropa elderinen áriptestik ornatýǵa usy­nystar túsken. Atalǵan elderdiń kom­pozıtorlarymen birlesip ja­zylǵan ánder taıaý kúnderi ja­ryqqa shyǵýy tıis.

Aıa О́mirtaı, «Egemen Qazaqstan»