Osydan bes jyl buryn Syr boıynyń batyry Buharbaı Estekbaıulynyń 200 jyldyǵyna Qyzylorda oblysy, Jalaǵash aýdanyndaǵy turatyn urpaqtary úlken as berdi. Aspen birge ata-baba dástúri attalmaı, alaman báıge bastalady. Báıgege eldiń túkpir-túkpirinen kelgen jaqsylar júırikterin qosty. Sáıgúlikter aq ter, kók ter bolyp máre syzyǵyna jaqyndaǵanda aldyna tulpar salmaı kele jatqan Kúreń júıriktiń shabandozy jalp etip, attan qulap túsedi.
Jyǵylǵan balany tóreshiler at artyna mingizip, Kúreńdi qýyp jetip, atqa qaıta mingizedi. Shabandozdy qaıta mingizem degenshe aldyńǵy top jarty aınalym ozyp ketse de, artynan qýyp jetip, tórtinshi bolyp máre syzyǵyn kesip ótedi. Dál osy sátte tebirenbegen, delebesi qozbaǵan adam sırek bolǵany sózsiz. Alamanda júırik pen jyǵylǵan balanyń erligine rıza bolǵan senator Qojahmet Baımahanov óz qaltasynan 300 myń teńge alyp, báıge atasa kerek.
Osy oqıǵaǵa kýá bolǵan, tamasha sátti túsirip alǵan qyzylordalyq fototilshi Bolat Omarálıev bylaı deıdi: «Ulttyq sara saıystyń qudireti de osy! Sonda jylqy degen kıeli maldyń bir adym da jarys erejesin buzbaı, baryn salyp alǵa umtylǵany, shabandozy atqa qaıta qonǵanda, odan beter túleı shapqany dúıim eldiń delbesin qozdyryp, bir aıqaı bastaldy. Osy joly halyq shýlap, báıgeni Kúreńge berý kerek dep turyp aldy. Sol joly bas báıge Kúreńge berildi me joq pa, bilmedim. Tóreshiler de báıge tártibin saqtaýy kerek».
Mundaıda báıge tóreshileri túrli paıym aıtady. Qatyp qalǵan ereje joq. Eger egesi jyǵylǵan sáıgúlik birinshi kelse, ekinshi attyń báıgesin berý kerek dese, at márege jetpeı jyǵylǵanda, shabandoz ózi jaıaý júgirip márege bas kıimin laqtyryp ótkizse – báıge sonyki deıdi. Al endi Buharbaı batyrdyń asyndaǵy atqa kelsek, birinshi bolyp ozyp kele jatqan Kúreńge tóreshiler shabandoz balany erge otyrǵyzamyz dep ýaqyt aldyryp aldy. Balany atqa otyrǵyzam degenshe on shaqty tulpar ozyp ketti. Kúreń at ózinen ozǵan júırikterdi qýyp jetem degenshe márege jaqyndap qaldy. Sonda da bolsa dúleı Kúreń kóbin qýyp jetip tórtinshi keldi, deıdi fototilshi.
Aınash ESALI, «Egemen Qazaqstan»
ALMATY
Sýretti túsirgen Bolat OMARÁLIEV