«Etnos kúni» jyl saıyn uıymdastyrylyp otyrady. Mádenı shara Astana qalasyndaǵy etnomádenı birlestikterdiń jetistikterin pash etýge, sondaı-aq, osynda turyp jatqan túrli ulttardyń salt-dástúrin nasıhattaýǵa arnaldy. Bul shara bıyl elorda tórindegi ortalyq saıabaqta ótti.
Festıval kezekti ret kavkaz mádenıetine arnaldy. Alǵashqysy osy jyldyń 13-15 sáýir aralyǵynda ótken bolatyn. Kavkaz halqynyń lezgınka bıi búginde birqatar elderde asa tanymal ekeni jasyryn emes. Shara barysynda ulttyq bıi jınalǵan qaýymdy eriksiz elitip ala jóneldi. Saltanatty jıynda kavkaz mádenıetinen bólek, Eýropa, slavıan, shyǵys halyqtarynyń mádenıeti, salt-dástúri keńinen tanystyryldy.
Sonymen qatar, Germanııa mádenıetaralyq baılanys ortalyǵynyń dırektory Konstantın Shamber týǵan eli týraly oı bólisti.
– Qazaqstan – meniń týǵan elim. Bala kúnimde tarıhı otanym Germanııaǵa kóship ketkenimmen qazaq jeriniń orny men úshin árdaıym joǵary. Munda jıi kelip turamyn. Ár kelgenimde qazaq eliniń kún sanap damyp bara jatqanynyń kýási bolamyn. Osy baǵytta jalǵastyrar bolsa, Uly Dala eliniń damyǵan memleketter qataryna qosylaryna senimdimin. Osyǵan deıin túrli elderge baryp kórdim. Biraq dál Qazaqstan sekildi ózge ult ókilderine meıirimmen qaraǵanyn baıqamadym. Búgingi kavkaz mádenıetin bir jyl ishinde ekinshi ret ótkizilip otyrǵany sonyń bir dáleli bolsa kerek, – dedi Konstantın Shamber.
Saltanatty jıynda «Hazar» ázerbaıjan etnomádenı birlestiginiń, «Van» armıan mádenı ortalyǵy» qoǵamdyq birlestiginiń, «Vaınah» cheshen-ıngýsh etnomádenı ortalyǵynyń ókilderi qala turǵyndary men qonaqtaryn dýmanǵa bóledi.
Aıan Ábdýálı, «Egemen Qazaqstan»