«El úshin týǵan erlerdiń Mártebesi kúnnen kúnge zor bolar». Jambyl Bizdiń býynnyń jastyq shaǵy romantıkaǵa toly kezeń edi ǵoı. Sol jalyndap júrgen kezimizde bolashaq Elbasymen kezdesip, til tabysyp, onymyz jyldar óte kele ynty-shyntymyzben uǵysqan shynaıy syılastyqqa ulasqanyn mańdaıyma jazylǵan taǵdyrdyń syıy dep bilemin. Jas degende sondaı jas ta emespiz, kishkene tanylyńqyrap, qyzmet istep júrgen kezimizde kezdestik. Alǵashqy kezdesý, álbette, Temirtaýda. Men osynda Almatydan Grýzııanyń Qazaqstanǵa arnaıy shyǵarmashylyq saparmen kelgen kınogerler delegasııasyn bastap ákeldim. Sonaý 70-shi jyldardyń ishinde. Nursultan Ábishuly onda Temirtaýdaǵy Qaraǵandy metallýrgııalyq kombınatynda partorg. Basıemiz osy kisi bolyp, 3-4 kún bizdi alyp júrdi. Qonaqtardyń jaǵdaıyn jasady. О́zin erkin ustaıdy, grýzındik marǵasqa zııaly, óner adamdarymen esh múdirmeı erkin sóılesedi. Mádenı demalys uıymdastyrýdy da umyt qaldyrmaı, Temirtaýdyń syrtyndaǵy sý qoımasyna alyp bardy. Balyq aýladyq. Bul kisi sonda óte ashyq-jarqyn, kóńildi júrdi. Jaıdary júzimen, taýyp aıtatyn sózimen adamdy baýrap alady. Grýzııalyq meımandarymyz Nurekeńe ábden rıza boldy. Ne degen ashyq, óresi bıik, jaqsy jigit dep jańaǵy grýzınderdiń talaıy aıtyp ketti. Qazaǵymnyń azamatyna basqa ult ókilderi tarapynan osylaı alǵys jaýdyrylyp jatqanyna men sonda qatty mereılenip edim. Ári osyndaı jarqyn tulǵaly zamandasymmen tanysqanyma, tabysqanyma qýanǵanym da áli esimde. Keıin osy tanystyq odan ári jalǵasty. M.Áýezov teatry Qaraǵandyǵa gastroldik saparmen bir kelgenimizde, burynǵy tanystyqty paıdalanyp, býymyz burqyrap, asaýdaı arqyrap júrgen jas kezimiz ǵoı, biraz jigitter keý-keýlep, Nursultannyń úıine qonaqtaýǵa ańsarymyz aýyp, jańbyr jaýyp turǵan tún ishinde barǵanymyz bar. Bálkim, eki-úsh jas úlken aǵalyǵymyzdy betke ustaǵan shyǵarmyz. Jeke úıde turady eken. Sonda uıyqtap jatqan adamdar, erteń jumys degendeı, ýaqyttyń keshtigine qaramastan, óner órenderiniń keı-keıde kóńildiń kúıimen keletin bir erkeligin kóterip, jaqsy qabyldaǵany bar edi. Dýmandatyp, án salyp, ádemi májilis quryp otyrǵanbyz. Qazir anda-sanda kezdesip qalǵanda Nurekeńnen: «Baıaǵy Temirtaýdaǵy kezdesýlerimiz esińizde me?» dep suraımyn ǵoı. «Árıne, esimde. Ondaıdy umytýǵa bola ma? О́zińiz bergen sýretterimiz de bar mende» dep kúledi ol kisi. Osy kezdesýlerimizdi jastyq shaǵymyzdyń jaqsy da jarqyn esteligi retinde ylǵı eske alyp aıtyp otyrady. Iá, Temirtaý Nursultan Ábishuly ekeýmizdi jaqyndastyryp ketti. Sodan beri dospyz. Aldyńǵy jyly birinshi dárejeli «Dostyq» ordenimen marapattap jatqanda da «dostyǵymyz jarasqan» dep óz aýzymen aıtyp, osylaı árbir joly, qaı kezde bolsyn mereıimdi ósirip júredi. Memleket basshysynyń osyndaı meıir-shapaǵatyna bólenip, mártebeli nazaryna ilinýimdi Qudaıdyń maǵan bergen baqyty dep esepteımin. Osydan onyń jalpy qazaq ónerine, mádenıetine, kıno men teatrǵa degen yqylas, qamqorlyǵynyń jyly samaly eskendeı. Temirtaýdan keıin Nursultan Ábishulynyń qyzmet baby satylap ósken saıyn Qaraǵandyda, Almatyda aýyq-aýyq sátin salyp buıyrǵan kezdesýler bolyp turdy. Jınalystarda, sezderde zaldan ótip bara jatyp baıqap qalsa burylyp kelip bir-eki aýyz bolsa da qanattandyratyn sóz aıtpaǵan kezi bolǵan emes. Magnıtteı daýasymen marqaıtyp tastaıdy. «Ulyq bolsań, kishik boldyń» naǵyz úlgisi osy shyǵar. Mınıstrler Keńesiniń tóraǵasy kezinde men M.Áýezov teatrynyń dırektorlyǵyna taǵaıyndalǵanymda kóp uzatpaı arnaıy qabyldap, jańa qyzmetime qutty bolsyn aıtyp, baıǵazysyna dep teatr ujymynyń paıdalanýy úshin bir avtobýsty qanjyǵamyzǵa baılap jibergenin de áste umytpaımyn. Teatrdyń jumysyn durys basqarýdy tapsyryp, sáttilik tilegen. Nurekeń ónerge qamqorlyqty da, basshylyqty da dabyralatpaı, urandatpaı, osylaı ret-retimen, jón-josyǵymen jasar edi. Jetpis jyldyǵymda da Aqordaǵa ádeıilep shaqyryp, qonaq qylyp, kabınetinde kúmis kezdik, kúmis qylysh syılady. О́mir týraly, óner týraly óreli áńgimelerin aıtty. Sonyń bárinde el jaǵdaıy, saıası ahýal da nazardan tys qalmaıdy. Solar jaıynda halyqtyń en ortasynda júrgen bizdiń pikir-paıymymyzdy bilýdi de artyq dep sanamaıdy. Bul da el basqarýdaǵy baıyptylyqtyń belgisi bolsa kerek. Nursultan Ábishuly keýdeme jarqyratyp «Altyn Juldyz» taǵyp mereılendirdi. Bárinen buryn sonshalyqty ystyq yqylaspen, adamgershilik úlken júrekpen, syılastyq kóńilmen qabyldaǵany janymdy qýanyshqa bólep, tolqytyp jiberdi. Qyryq jyldan astam ýaqyttan bergi tanystyq dostyǵymyzdy taǵy da jurttyń kózinshe aıtyp jatyr. Biraq men úshin Elbasynyń maǵan degen taza adamı qatynasy, dostyq peıili men kóńili jańaǵy ataqtan da qymbat. Basqa elderdiń de basshylaryn baıqap júremiz ǵoı, al dál mynadaı baýrap alar aqjoltaılyq, izgilikti qasıet tek bizdiń Elbasymyzdyń ǵana qolynan keledi. Nursultan Ábishuly áńgimeniń bir retinde: «Balańyz, kishkentaı Asanáli qalaı? Jigit bop qalǵan shyǵar?» dep surap jatyr. «Jeńgeńiz ekeýi osynda, birge kelgen, syrtta meni kútip otyr» deýim sol edi, Nurekeń dereý pármen berip, ulym men zaıybymdy kabınetine aldyrdy. Baǵdat jeńgeleriń sol arada sálem salyp edi, Nursultan Ábishuly sonshalyqty bir degdar zııattylyqpen toqtatyp: «Joq, siz sálem salmaısyz. Siz maǵan jeńge bolasyz. Maǵan ǵana emes, jalpy halqymyzǵa jeńge bolasyz» dedi. Osyǵan da rıza boldyq, tebirendik. Asanáli balam Nursultan atasyna Farıza Ońǵarsynovanyń «Perzent sálemi» degen óleńin oqyp berdi. Munysy Prezıdentke qatty unap, ol kisi sol jerde, ózi aıtqandaı, kishkentaı Asanálige óziniń altyn qalamsabyn syılady. Qazaqtyń «patsha kóńil» degen tamasha sóziniń shyǵý tegin men endi uqqandaımyn. Shyn máninde de Elbasymyz erekshe jaratylǵan jan ǵoı. Balanyń da, dananyń da, qaranyń da kóńilin tabady. Mysaly, biz gastrolmen nemese kıno túsirip júrip túrli elderge baramyz. Sonda kezdesken adamdardyń barlyǵy bizdiń Prezıdentimizdiń qadir-qasıetterine erekshe tánti bolyp, esimin qurmetpen atap jatady. Osyndaı Prezıdentterińiz bar sizder baqyttysyzdar ǵoı, bolashaǵy jarqyn elsizder ǵoı dep bizge kádimgideı qyzyǵady. Basqalar qyzyqsa qyzyqqandaı. О́zimiz shattana turyp shúkir, táýbe demekpiz. Osynaý jyldar ishinde Nursultan Nazarbaevtyń kemeńger basshylyǵymen eń basty tabysymyz Táýelsizdikke qol jetkizip, eń tamashasy, naq osy egemen-erkindigimizdi baıandy etip, jahan tanyǵan, baısal saıasat ustanǵan bahadúr memleketke aınaldyq. Saryarqanyń saıyn tósine gaýhartas, jaýhartastaı qulpyryp ornaǵan elordamyz túp-túgel Nursultan Ábishulynyń tolaǵaı eńbeginiń arqasy, kóregendiginiń kelisti jemisi der edim. Aqyndarsha aıtqanda, aıtaqyrǵa baq ornatyp, gúldendirip jiberdi. Bul ózi bir keńinen tolǵap bastalǵan, jan-jaqty oılastyrylǵan aqyldy jumys boldy. Alash arystary armandaǵan elordany bostan Qazaqstannyń qaq kindigine turǵyzdy. Qazir barshamyzǵa súıikti Astanamyz álem elderiniń ataǵy dúrkiregen qalalarynan qalmaıtyndaı, álemdik deńgeıdegi alqaly da alaman jıyndar, halyqaralyq keleli is-sharalardy jarqyn júzben, esh uıalmaı ótkizetin, maqtanysh etetin jaǵdaıǵa keltirildi. Astana jańa sıpattaǵy Qazaq eliniń brendine aınaldy. Aqorda, «Báıterek», «Táýelsizdik saraıy», «Qazaq eli» monýmenti, «Máńgilik El» qaqpasy, Pıramıdadan bastap Astananyń nyshandy kelbet-kórkin aıqyndaǵan óz brendteri de jetip artylady. Osy rette asqaq armandar qalasynyń avtory, bas jobalaýshysy, bas sáýletshisi Nursultan Nazarbaevtyń qajyr-qarymy men danalyq-darynyna tánti bolmasqa áddińiz joq. Al endi búkil adamzat úshin bolashaqtyń energııasyn qamdaýdy izgilikti murat tutqan dúnıejúzilik EKSPO kórmesiniń álem nazaryn aýdaryp osy kúnderde Astana tórinde tabysty ótip jatýy saıası mańyzy orasan zor oqıǵa desem artyq emes. «Kúldir-kúldir kisinetip Aqtamberdiler jyrǵa qosyp, «Oıpań jerge on otaý, Qyrań jerge qyryq shatyr tigip, Qonaǵymdy jaıǵasam!.. Atymtaı jomart sekildi Ataǵym jurtqa bilinse! Maı jemese qonaǵym, Qan jemese baraǵym, On kisige jarasa bir kisige arnap tartqan tabaǵym! Halyqqa atym bilinip, Shúleńgir myrza atanar ma ekemiz!» dep aıshyqtalǵan ata qazaqtyń armany oryndalǵanynyń eń bir tolaıym kórinisi osy Astana EKSPO-sy emes pe. Endeshe, Atymtaı jomart atanyp, Shúleńgir myrzalyǵy bilinip, halqymyzdyń sol asyl armanyn júzege asyryp oryndaǵan – Nursultan. Bul budan toqsan jyldyń árisinde Parıjde Ámire Qashaýbaev Aqan seriniń «Balqadıshasyn» áýeletip shyrqaǵan EKSPO edi. Qazirgi EKSPO-da qazaqtyń barlyq ánderi shyrqalýda, barlyq kúıleri tartylýda, qazaq dúıim dúnıege barlyq qyrynan jarqyrap kórinýde. Álbette, bul – eldigimizdiń jemisi! Elbasynyń jeńisi! Nursultannyń kóz qýantqan, dosty súıindirgen búgingi nurly Astanasy osyndaı. Jaqsylyq kóptik ete me? Elbasymyz osy jaqsylyqty eline, jurtyna tileıdi. Myna EKSPO-dan keıin de elordamyz sonyń sharapatymen kórkeıe bersin deıdi. Eń bastysy, elge jaqsylyq jasalýy kerek. EKSPO úshin salynǵan ǵımarattar elimizdiń mádenıetine qyzmet etedi. Qanshama adamdar jańa úılerge kirip qýanady. Osynyń bári aldyn ala eseptelgen. Saıyp kelgende, halqymyzdyń turmysy jaqsarady, ómiri kórkeıedi. Astananyń ajar-kelbeti odan ári shyraılanady. Men burynǵy Aqmolaǵa alǵash ótken ǵasyrdyń alpysynshy jyldary aıaq basyp edim. Kelip kıno túsirgenbiz. Áýelde adam da, Qudaı da umytqan bir jer eken degendeı áserde bolǵanymyz da ras. Aqıǵan sýyq. Aqyrǵan boran. Shalǵaıdaǵy bir túkpir. Úıleri de jupyny. Shashyrap jatqan provınsııalyq qala bolatyn. Qazir burynǵy kórinistiń biri joq. Múldem ózgerip ketken. О́zgerip ketken deımin-aý, bastan-aıaq jańadan turǵyzylǵan qala ǵoı. Jaýhar qala, jasampaz shahar! Sáýleti sheteldiń qalalaryndaǵy ǵımarattardan esh qalyspaıdy. Kóne men jańa qabysqan ózgeshe máner. Ár keshen, ár ǵımarat ózinshe dara. Osyǵan endi osyndaǵy halyqtyń, turǵyndardyń ózin-ózi ustaý, kóshede, qoǵamdyq oryndarda júrip-turý mádenıeti de úılespek kerek deıdi ishki bir pikirim. Ásemdik pen tazalyq bir-birimen baılanysty uǵymdar. Mynadaı kórikti kóshe, tap-taza jerde kele jatyp birdemeni búldirip lastaýǵa, birdemeni laqtyryp ketýge qolyń da, dátiń de barmaıdy dep oılaımyn. Bul bizge baıaǵy Selınograd, baıaǵy Aqmola emes. Bul ásem Astana, aıaýly elorda... Aınalasy tazaryp ajarlanǵan saıyn adam da soǵan úırenedi, beıimdeledi, ózi de tazarady. Ádemilikke, sulýlyqqa den qoıyp, ózi de sonyń bir bólshegine aınalady. Uıaty bar adam, mádenıeti bar adam sóıtpeı tura almaıdy. Osylaı paıymdaǵanda, bizdiń Astanamyz úlken tárbıe ordasy, ásirese, jelkildep ósken jastardyń tárbıeshisi, mádenıetke úıreter uly ustazy degenimiz lazym. Demek, Nursultannyń Astana baıtaǵy rýhanı jańǵyrýǵa, elimizdiń adamı kapıtalyn jaqsartýǵa da óz údeli úlesin qapysyz qosyp keledi. Buryn óner-mádenıettiń ortalyǵy Almaty boldy ǵoı. Ásirese, sońǵy jyldarda mádenıet pen óner ordalary Astanada kóptep salyna bastaǵany bir ǵanıbet. Munda «Astana Opera», «Astana Balet», «Qazaqstan» ortalyq konsert zaly sııaqty nysandar salynyp, jańa shyǵarmashylyq ujymdar qurylsa, osynyń bári Elbasynyń mádenıetke árkez birinshi kezekte kóńil bóletindiginiń aıǵaǵy. Astananyń mádenı áleýeti qýatty bolý kerektigin el Prezıdenti kúlli jan-júregimen sezinedi. Elbasynyń ekonomıka, qarjy, saıasat, qurylys, meıli qaı jaǵynan bolsyn jan-jaqty daryn-talanty álemdik deńgeıde, ataqty tulǵalar tarapynan moıyndalǵan aqıqat ekenin bilemiz. Bilim-parasaty bıik mártebesine saıma-saı. Bizdiń qazaq: «Handa qyryq kisiniń aqyly bolady» dep tegin aıtpaǵan ǵoı. Nursultan Ábishulymen ár kezdesken saıyn, ár joly áńgimesin tyńdaǵan saıyn, árbir izgilikti isine kýá bolǵan saıyn sol sózdiń shyndyǵyna kózimdi jetkize túsemin. Meni de: «Jumystan qalmańyz. Jumys istegen adam qartaımaıdy. Shyǵar bıigińiz áli alda!» dep qamshylap qaırap, jasym ulǵaıǵan shaqta da biraz shyńdy baǵyndyrýyma, azamattyq belsendiligimdi tómendetpeýime qaırat qosqany anyq. Bir ǵajaby, men biletin, jalpy el biletin Elbasy, barlyq basqa qyrlaryna qosa, ónerge jaqyn. Al ónerge jaqyn adamdar ómirde kóp nársege jetedi. Keıbir ónerden alys adamdar bolady. О́ziniń hımııasyn, fızıkasyn ǵana biledi. Basqa nárseni esh kerek qylmaıdy. Ádebıet pen mádenıetke enjar. Kitap oqymaıdy. Hımııadan ol akademık. О́z basym ondaı akademıkti asa kúshti akademık dep aıta almas edim. Elbasynyń artyqshylyǵy – jan-jaqty kemel daryndylyǵynda. Ár salada, bar salada kemeńger. Sonyń ishinde bizge aıryqsha unaıtyny, janymyzǵa maıdaı jaǵatyny, jańa aıtqanymdaı, Nursultan Ábishuly sonaý erte kezden mádenıetke, rýhanııatqa, jalpy halyqtyń diline óte jaqyn. Bir jaǵy sol jaqyndyǵynyń, óner-mádenıetti tereń túsinýiniń arqasy emes pe, ómir boıy ánimizdi aıalap, ónerimizdi qurmettep, baǵasyn bilip, barlyǵymyzdyń jaǵdaıymyzdy jasap, tirshiligimizge tirek bolyp kele jatqany. Elbasymyzdyń osyndaı bolǵany qazaq óneriniń baǵy. О́te suńǵyla adam. Rýhanııat salasyndaǵy qaıratkerlerimizdi jyǵa tanyp, kimniń kim ekenin aıtpaı bilip otyrady. Ádebıettiń áńgimesine de júırik. Kórnekti jazýshylarymyzdyń shyǵarmalary týraly baıypty pikirin aıtyp, aqyndardyń unaǵan óleńderin umytpaıdy. Mádenıet adamdarynyń Elbasy synyna tolýy da ońaı emes. Osyndaı dara bolmysty kisimen sóılesý, pikir paıymyn tyńdaý árqashan qyzyqty, paıdaly. Prezıdentpen bolǵan ár kezdesý, ár áńgime – bir mektep, ómir sabaǵy, ónege daraǵy. Ol mektepten kóp nárseni kókeıge toqyp, úırenip, bilip, ańǵaryp shyǵasyń. Isharasynan, sóziniń astarynan uǵynasyń. «Kýzkına matqa» basatyn baıaǵy Hrýshev emes, bizdiń Prezıdent úlken mádenıettiń adamy. Qajetti jerinde maqtamen baýyzdaǵandaı zııat mánermen, kóńilge kelmeıtin, renjispeıtin jaǵdaımen jetkizedi. Talaı márte kórip te, baıqap ta júrmiz, bizdiń Prezıdentimiz shetelderdegi saparlarynda, shetelderdiń prezıdentterimen, memleket basshylarymen kezdeskende solarmen terezesi teń, tipti, joǵary turady. Men sonysyna rıza bolyp, soǵan mereılenemin. Qazaq eliniń namysyn qoldan bermeıtin, rızyq-nesibesin qorǵaıtyn osyndaı patshamyz bolǵanyna táýbe etemin. Halyq pen eldiń jaǵdaıyn oılap, qanshama kelisimsharttarǵa qol qoıyp, keshegi EKSPO-ǵa kelgen memleketter basshylarynyń árqaısymen jeke-jeke qarym-qatynas jasap, kóptegen túıtkilderdi mámilegerlikpen, sarabdal saıasatkerlikpen, óziniń bıik abyroı-bedelimen retke keltirip otyrǵany da jasyryn emes. Kim bilipti, jerińe, baılyǵyńa qyzyǵatyndar da, ordamyzǵa kúlip kirip, kúńirenip shyǵatyndar da joq emes shyǵar. Osynyń bári, Maǵjan aqyn aıtqandaı, «aýyr salmaq». Osy arada Qudaıǵa shúkir deıik, sol aýyr salmaqty kóteretin, qandaı synǵa da tótep beretin Elbasymyz bar. Mine, Nursultan Nazarbaevtyń danalyǵy sonda, sondaı jaǵdaılardyń bárine dıplomatııalyq jol tabady, kúrdeli túıtkilderdiń kúrmeýin aqylmen sheshedi. Memleket basyndaǵy adamdardyń qarym-qatynasy memleketaralyq qatynas. Qaraqan bastyń qamy emes, memlekettiń múddesin kózdeıdi. Bizdiń Elbasymen sóıleskender árqashan razy kóńilmen, eldiń shynaıy jaǵdaıyn kórip, el irgesiniń bekem-beriktigine kózderi jetip ketip jatady. Elin jaýǵa da, daýǵa da bermeıtin osyndaı kemel Eriń, beren beliń bolǵany qandaı ǵajap! El basqarý – ónerdiń úlkeni. Ár eldiń, ár jurttyń psıhologııasyn bilý kerek. Aıtalyq, bizdiń akterlerdiń negizgi páni – psıhologııa men fılosofııa. Psıhologııa kóp nárseni úıretedi. Psıholog adam máseleniń túbirin, túbin tekserip, tereń bilip turady, keleshektiń damý baǵdaryn kórip turady. Bizdiń Elbasy – tereń psıholog. Kezdesken, sóılesken adamnyń ishki ańǵaryn kózinen, sózinen tanıdy. Elimizge degen nıeti túzik pe, buzyq pa – aıtpaı ańǵarady. Meıli kóripkeldik, meıli kóregendik deńiz, Nursultan Ábishulynda osy eki qasıettiń ekeýi de bar. Ol kisi tereń psıhologııalyq ıirimdermen, fılosofııalyq alǵyr oımen astarlap sóılegende el men el tabysyp, mádenıetter qaýyshyp jatady. Basqalar bizdiń elimizdiń qandaı el ekenin tanyp bilip jatady. Kósemine qarap kósegesi kógeretin el ekenin biledi, bizben dos bolýǵa qulshynady. Elbasylyq eren dıplomatııa osyǵan keltiredi. Mine, Nursultan Nazarbaevtyń bekzat bolmysynyń, dara qasıetteriniń, Abaı hakim aıtqandaı, «tas bulaqtyń sýyndaı syldyrap» úılesken kemel jarasymy osyndaı. Árıne, bir adamǵa búkil eldiń bereke-birligi men baqýatty tirligin qamdap, tynyshtyǵyn qamtamasyz etý, ár kezeńde damýdyń durys baǵdar-baǵytyn oılastyryp, almaǵaıyptarda adastyrmas temirqazyqtaı týra joldy tańdap taýyp otyrý ońaı emes. Úzeńgiles serikteri, biz sııaqty el azamattary, zııaly qaýym sol qıyn jumysta qoldan kelgenshe aıanbaı el isine jumylyp járdem berýimiz kerek. Ol úshin áýeli óz jumysyńdy taza iste. Jaqsylyǵyńdy halyqqa jasa. Elbasyna seniń kómegiń sol. Al endi jaýyrdy jaba toqyp, ótirik aldap, jaǵynyp qalýǵa tyrysyp ótirik maqtap júretinder de bar. Ishten de, syrttan da. Ony da bilý kerek. Ondaı qıturqy zymystandardan saq bolýymyz kerek. Yrdý-dyrdý, dabyra, sybys, túımedeıdi túıedeı qylýǵa áýestik, anaý anadaı eken, mynaý mynadaı eken degen jyltyr sózder de eldigimizdi nyqtaýǵa kómek te bermeıdi, qoldaý da bolmaıdy. Ondaı qolamta kósegishter, kerisinshe, bereke-birligimizdi iritedi. Istep jatqan eshbir isi joq, qur sózben iritedi. «Sóz tas jarady, tas jarmasa bas jarady» degen ǵoı. Qysqasy, sózdi azaıtyp, ıgi isti, ilkimdi áreketti kóbeıtý kerek. Memlekettiń dertesin tartqan Elbasynyń azamattardan, jalpy elden surap otyrǵany osy. Talaby da osy. Men de osyǵan, árýaqyt Elbasymyzdyń oń jaǵynan shyǵýǵa shaqyramyn halyqty. Sózdi azaıtaıyq, áreketti kóbeıteıik, aq-adal mańdaı terdiń jemisin jeıik. Sonda durys bolady. Tek tynyshtyq, beıbitshilik bolsyn deńiz. Men ózim optımıspin. Nursultan Ábishulynyń dana basshylyǵymen zaman jaqsara beredi dep bilemin. El tynysh bolyp, osy alǵan betimizben, sara baǵytymyzdan taımaı alǵa basa bersek, kóp nársege, budan da tolaǵaı tabystarǵa jetemiz. Ámse sol jaqsylyqtardy qadirmendi Elbasymyzben birge kóre berýge jazsyn!
Asanáli Áshimov, Qazaqstannyń Eńbek Eri