Qos memleket astanalaryn baılanystyratyn reıs aptasyna 3 márte jıilikpen, ıaǵnı dúısenbi, beısenbi jáne jeksenbi kúnderi oryndalady. Jańa halyqaralyq tasymal Memleket basshysy Nursultan Nazarbaevtyń 2020 jylǵa deıin elimiz arqyly ótetin tranzıttik jolaýshylar aǵynyn 4 esege deıin ulǵaıtý jónindegi tapsyrmasyn oryndaý aıasynda júzege asýda. Sońǵy 7 jylda tranzıttik áýe jolaýshylar aǵyny 20 esege artqan. Bolashaǵy zor baǵyttardyń biri Úndistannan Qazaqstan arqyly TMD elderine baǵyttalǵan tranzıttik jolaýshylar marshrýty bolyp tabylady. Astanalar arasyna qatynaıtyn reıs – 2004 jyldan beri «Eır Astana» áýe kompanııasy oryndap kelgen Almaty – Delı – Almaty reısin tolyqtyratyn tıimdi joba. Bul reıs «Astana» halyqaralyq qarjy ortalyǵyn damytýda iskerlik belsendilikti yntalandyrý úshin qyzmet etetin bolady. Halyqaralyq reısti ashýda qazaqstandyq Azamattyq avıasııa komıteti men Úndistannyń avıasııalyq bıligi birlese jumys atqardy.
EKSPO-2017 halyqaralyq mamandandyrylǵan kórmesiniń qonaqtaryna jaǵdaı jasaý maqsatynda «Eır Astana» áýe kompanııasy oryndaıtyn Astana – Delı – Astana baǵyty boıynsha jańa halyqaralyq reıs ashylady.