Jıyrmadan astam týrıstiń arasyndaǵy ǵaryshker bul jolǵy saparynyń da qyzyqty ári áserli bolatynyna senimdi. «EKSPO – óte qyzyqty shara, oǵan kóptegen týrıst kelýge tıis dep oılaımyn. Kórme ádemi jerde ornalasqan, bárin jaqsy qarsy alatynyna senimdimin. Men Astana men Baıqońyrda birneshe ret boldym. Biraq ushýǵa daıyndyqtan ótip jatqandyqtan, elińizdiń basqa jerlerine barýǵa múmkindigim bolmady. Bul joly keremet áser alatyn túrim bar. Baıqońyr – adamzattyń ǵaryshty ıgerý tarıhy bastalǵan óte mańyzdy oryn, áli kúnge deıin paıdalanylyp júr. Men Iýrıı Gagarınniń izimen osy jerden eki ret ǵaryshqa ushqanmyn. Bul – adamzattyń armany aqıqatqa aınalatyn kıeli jer. Qazaqstannyń bolashaǵy zor, muny biz Astanaǵa qarap aıta alamyz. Álemde talaı daǵdarys bolyp jatqan kezde de turaqtylyǵyn saqtap tur. Qazaqstan men Nıderland arasynda tyǵyz qarym-qatynas ornaǵan, osy áriptestigimiz, ásirese, ǵarysh salasynda jalǵasatynyna senemin», deıdi Andre Kaýpers.
Nıderland týrısteriniń bir toby EKSPO-2017 halyqaralyq kórmesine qatysý úshin Amsterdamnan Astanaǵa keldi. Olardyń arasynda belgili gollandııalyq ǵaryshker Andre Kaýpers te bar. Ol álemge áıgili Baıqońyr aılaǵynan eki márte ǵaryshqa ushqan.