Kózden bul-bul ushqan 140 ball

Bıyl UBT 165 tapsyrý pýnktiniń 1431 aýdıtorııasynda ótkizildi. Bul aýdıtorııalar baılanys sıgnaldaryn bógeıtin qurylǵylarmen, metall de­tektorlarymen, UBT barysyn ba­qy­laý jáne jazý beınekameralary­men jabdyqtaldy. Ata-analarǵa yń­ǵaılylyqty qamtamasyz etý maq­sa­tynda 108 pýnkttegi UBT barysy monıtorǵa shyǵarylyp, kórsetildi. Ádettegideı, UBT ótkizý oryndarynda medısınalyq qyzmet pen quqyq qorǵaý organdarynyń ókilderi  jumys istep, aýyz sý jáne taǵam ónimderin satý oryn­dary qyzmet kórsetti. Belgilengen tár­tip boıynsha UBT-nyń ótkizilýi men ere­jelerdiń oryndalýyn qadaǵalaý úshin testileý ótkiziletin pýnkt­terge Bi­lim jáne ǵylym mınıstrligi tarapynan 1818 ókil, onyń ishinde joǵary oqý oryn­dary (75%)  jáne kolledjderdiń (25%) oqytýshylary jiberildi. 

Ortalyq kommýnıkasııalar qyz­me­tindegi brıfıngte Ulttyq testileý ortalyǵynyń dırektory Ramazan Álimqulov 74 myńnan astam oqýshynyń UBT-da tómengi kórsetkishten joǵary ball jınaǵandyǵyn atap ótti. Onyń aıtýynsha, bıyl eń joǵary 140 baldy eshkim jınaı almady. Al 139 baldy Almatydaǵy Muqaǵalı Maqataev atyndaǵy mekteptiń oqýshysy Tasan Saıat jınady. Taǵy 7 oqýshy 138 ball aldy.

Ulttyq testileý ortalyǵy usynǵan má­li­metterge sensek, bıyl 5064 adam 120-dan joǵary ball jınasa, oqý­shy­lar­dyń 70,7 paıyzy (52 717) 66-119 ball, 7,9 paıyzy (5935) 60-65 ball al­ǵan. 

«UBT-da eń tómengi ball – 50. Emtı­han barysynda 74517 túlek osy kór­setkishten joǵary ball jınady. Bul 80,5 paıyzdy quraıdy. Byltyr bul kórsetkish 81 paıyz bolǵan. О́kinishke qaraı, qalǵan oqýshylar tómengi ball jınady», deıdi Ramazan Álimqulov. 

Degenmen, qajetti mejeden óte al­ma­ǵan 14066 oqýshy jańa ereje boıyn­sha tamyz aıynda UBT-ny qaıta tap­syra alady. Sol kezde testileýden ót­pese, oǵan endigi jyldyń tamyz aıyn­da UBT-ny úshinshi ret qaıta tapsyrý múm­kindigi beriledi. 

Sonymen qatar, bıyl alǵash ret test barysyn onlaın kórsetý júzege asyrylǵanyn da erekshe atap ótýge bolady. Bul qyzmet barlyq adamǵa Qazaqstannyń kez kelgen núktesinde ótip jatqan Ulttyq biryńǵaı testileý barysyn qadaǵalaýǵa múmkindik berdi. «Biz­diń paıymymyzsha, bul qyzmet bu­zý­shylyq deńgeıin tómendetýge aı­tar­lyqtaı septigin tıgizdi. UBT-ny ót­kizý erejesin buzǵany jáne uıaly te­le­fon syndy tyıym salynǵan zattar­dy qoldanǵany úshin testileýden 12 túlek shyǵaryldy. Jalpy testileý ba­rysynda 84 myńnan astam tyıym salynǵan zattar, onyń ishinde 40 myńn­an astam elektrondy qurylǵylar men  40 myńnan astam qaǵaz túrindegi shpargalkalar alyndy», – dedi Ulttyq testileý ortalyǵynyń dırektory.  UBT ótkizý oryndarynda quramynda negizinen 3300 pán muǵalimi bar apellıasııalyq komıssııa jumys istedi. Al respýblıkalyq apellıasııalyq komıssııa quramynda 54 adam boldy. Res­pýb­lıkalyq komıssııaǵa mazmuny boı­ynsha 199 test tapsyrmasy túsip, onyń 103-i qanaǵattandyryldy.  Ramazan Álimqulovtyń aıtýynsha, Ulttyq testileý ortalyǵy túlekke UBT-ny basqa pýnktte tapsyrýǵa ruqsat berý múmkindigin zańdastyrý boıynsha usynys engizbek. Buǵan bıylǵy tes­tileý barysynda aýrýhanadan shyq­qan oqýshynyń basqa pýnktke baryp test tapsyra almaı qalýy áser etken.  Bıylǵy testileý synaǵynyń negi­z­gi erekshelikterine taǵy bir márte toq­talaıyq. Eń aldymen, Ulttyq biryńǵaı tes­tileý 5 pán boıynsha tapsyryldy. Atap aıtqanda, Qazaqstan tarıhy, matematıkalyq saýattylyq, oqý saý­attylyǵy (20 tapsyrmadan, shekti deń­geıi – ár pánnen keminde 5 baldan) jáne tańdaǵan mamandyqqa sáıkes 2 beıindi pánnen (30 tapsyrmadan, shekti deńgeıi 15 baldan kem bolmaýy tıis) tapsyrdy. 120 testileý tapsyrmasy boıynsha túlek maksımaldy 140 ball jınaı alady. Tapsyrmalardy oryndaýǵa 3 saǵat 50 mınýt ýaqyt bólindi. 

Gúlnur QÝANYShBEKQYZY, «Egemen Qazaqstan»