Sý sporty Qazaqstandyq sýda júzýshi, Rıo Olımpıadasynyń chempıony Dmıtrıı Balandın Bolgarııa ashyq chempıonatynda brass ádisimen júzýden 2 altyn, 1 qola medal ıelendi. 100 jáne 200 metrge júzýde Dmıtrıı aldyna jan salmady. Eki qashyqtyqta da birinshi keldi. Al 50 metrge brass ádisimen júzýde qola medaldy qanaǵat tutty. Dmıtrıı Balandın Bolgarııa ashyq chempıonatynan keıin 14-30 shilde aralyǵynda Vengrııa astanasy Býdapeshtte ótetin álem chempıonatyna qatysady. Aıta keteıik, bul otandasymyzdyń Rıo Olımpıadasynan keıingi alǵashqy halyqaralyq jarysy.
Alpınıada Almatyda Astana kúnine arnalǵan dástúrli «Nursultan shyńy-2017» alpınıadasy ótti. Atalmysh sharaǵa 5 myń adam qatysqan. Onyń ishinde Eýropa men Azııa elderinen kelgen qonaqtar da bar. 4 376 metrdi baǵyndyrýǵa tilek bildirýshiler arasynda kásipqoı sportshylar, balalar men eresekter de boldy. Nátıjesinde, erler arasyndaǵy básekede Malık Abdý-Aset shyńdy 1 saǵat 55 mınýtta birinshi bolyp baǵyndyrsa, áıelder arasynda Aıjan Jombatyr shyńǵa 2 saǵat 27 mınýtta shyqty.
Tennıs Halyqaralyq tennıs assosıasııasy tennısshilerdiń reıtıngin jańartty. Shilde aıynyń basyndaǵy erler arasyndaǵy reıtıng boıynsha qazaqstandyq tennısshi Mıhaıl Kýkýshkın 118-ornyn saqtap qalsa, Aleksandr Býblık bir saty tómendep, 135-orynǵa syrǵydy. Al, qyzdar arasyndaǵy reıtıngte Qazaqstannyń birinshi nómirli raketkasy Iýlııa Pýtınseva 43-orynnan kórindi. Iаroslava Shvedova eki saty tómendep, úzdik 50 sportshyny qorytyndylap tursa, Zarına Dııastyń reıtıngtegi orny ózgergen joq. Ol – 130-satyǵa jaıǵasqan.
Kásipqoı boks Qazaqstandyq kásipqoı boksshy Mıras Jaqypov Qytaıda óziniń ekinshi kezdesýin ótkizip, 1 raýndta tehnıkalyq nokaýtpen jeńiske jetti. Jartylaı jeńil salmaqta judyryqtasatyn otandasymyz jergilikti Tık Týerhýnjıangpen sharshy alańǵa shyqqan bolatyn. Eske sala keteıik, Mıras Jaqypov kásipqoı bokstaǵy alǵashqy kezdesýin osy jyldyń qańtar aıynda ótkizip, qytaılyq boksshy Gýandjı Jendi upaı sanymen utqan edi.
Álı BITО́RE, «Egemen Qazaqstan»