Astanaǵa Aqmeshit arqyly gaz keledi

Qyzylorda oblysynda Qazaqstannyń gaz salasy úshin asa mańyzdy shara boldy. Qýatty ári zamanaýı bul nysannyń salynýyn mamandar teńdessiz oqıǵa dep baǵalap otyr. О́ıtkeni, ońtústiktiń gaz problemasy sheshilýimen qatar Astana men elimizdiń soltústik oblystaryn da gazben jabdyqtaıtyn nysan salyndy. Strategııalyq mańyzdy «Qaraózek» kom­pressorlyq stansasynyń ashylýy oblys ákimi Qyrymbek Kósherbaev, «QazMunaıGaz» UK AQ pen ulttyq operator «QazTransGaz» kompanııasynyń basshylyǵynyń qatysýymen saltanatty túrde paıdalanýǵa berildi.   Ońtústiktiń gaz qajettiligin tolyq sheship, eksporttyq áleýetti arttyrǵan bul joba kópten aıtylyp júrgen sol­tús­tik óńirlerdi gazdandyrýǵa múm­kindik bermek.  – Bolashaqta elordany gazdandyrý jumysy qasıetti Syr eliniń jerinen bastaý alady. Elbasynyń qoldaýymen bastalǵan iri strategııalyq mańyzy bar «Beıneý – Bozoı – Shymkent» magıstraldy gaz qubyry bizge zor múmkindik berdi. Ob­lys aýmaǵynan ótetin 846 shaqy­rym­dyq gaz qubyry Qyzylorda obly­syn gaz­dan­dyrýǵa jol ashty. Bul – Memleket bas­shy­synyń bizge jasaǵan tikeleı qam­qor­lyǵy. Stansanyń iske qosylýy – gaz salasy qyzmetkerleriniń Astana kúni­ne jasaǵan zor syıy, – dedi aımaq basshysy.  Bul joba bizdiń respýblıkanyń ǵana emes, búkil eýrazııalyq kontınent­tiń tranzıttik áleýetin arttyrady desek, artyq aıtqandyq emes. Memleket basshysynyń gazdandyrý kólemin ul­ǵaıtý, energııa resýrstaryn tasymaldaý­dy ártaraptandyrý jónindegi tapsyrmasyn «QazTransGaz» kompanııasy josparly túrde júzege asyryp keledi. Jáne kóp­shilik onyń ıgiligin kórip otyr.  Búginde otandyq gaz tasymaldaý salasy naǵyz tehnıkalyq revolıý­sııa­ny bastan ótkerip jatyr. Osy jyl­dyń alǵashqy jartysynda Qazaq­stan­da gaz ınfraqurylymynyń joǵary teh­no­logııalyq eki nysany salyndy. Olar – Aqtóbe oblysyndaǵy «Bozoı» men Qyzylorda oblysyndaǵy «Qaraózek» kompressorlyq stansalary. Eki jobany da eldi otandyq gazben qamtamasyz etýdi, strategııalyq «Beıneý – Bozoı – Shym­kent» magıstraldy gaz qubyrynyń tasymaldaý múmkindigin arttyrýdy maqsat etken ulttyq operator – «QazTransGaz» kompanııasy júzege asyrdy.  Joǵary tehnıkalyq kúrdeliligine qaramastan, «Qaraózek» stansasy mer­ziminen jarty jyl buryn iske qosylyp otyr. Bul «QazTransGazdyń» kompanııa rezervindegi gaz aıdaıtyn qondyrǵylardy paıdalanýy esebinen múmkin boldy. Sóıtip, memlekettiń mıllıardtaǵan qarajaty, qyrýar ýaqyty únemdeldi.  Saltanatty jıynda «QazMunaıGaz» UK AQ vıse-prezıdenti Qaırat Sháripbaev «Qaraózek» jáne «Bozoı» kompres­sorlyq stansalarynsyz qazaq­stan­dyq gazdy Qytaıǵa tasymaldaý jáne eldiń ońtústigindegi energetıkalyq qaýipsizdikti qamtamasyz etý múmkin emes ekenin jetkizdi. Osyny túsine otyryp, Memleket basshysy «Beıneý – Bozoı – Shymkent» magıs­traldyq gaz qubyryn salýdy tap­syrdy. Ýaqyt kórsetkenindeı, bul der kezindegi sheshim boldy. Taıaý arada ǵana biz Qytaımen jylyna 5 mlrd tekshe metr otandyq gaz eksporty týraly memo­randýmǵa qol qoıdyq» – dep atap ótti.  Stansanyń negizgi elementi – ju­mys­­­­tyń eń kúrdeli rejimine arnalǵan  «Solar Turbines» amerıkalyq kompanııa­sy­nyń joǵary tehnologııalary negizinde ázirlengen gaztýrbınalyq qondyrǵylar. Barlyq úsh agregatty paıdalanǵan kezde kompressorlyq stansanyń ónimdiligi táýligine 43,5 mln tekshe metrge jetedi.  Gaz aıdaýshy agregattardy iske qos­qannan keıin qonaqtar kompressorlyq stansany aralap, jumysymen tanysty. 

Nazerke SANIIаZOVA, jýrnalıst

Qyzylorda oblysy