«Rýym Tobyqty, onyń ishinde Yrǵyzbaı, О́skenbaıdyń Myrzataı degen aǵasynan taraımyz. Myrzataıdan Juman, onyń 9 ulynyń bireýi Ázimbaı. Juman atamyz «Abaı joly» roman-epopeıasyna engen adam. Shákárim atylǵanda nemere aǵaıyndary Qydyr men Shyńǵys Ázimbaevtar aqynnyń kóp dúnıelerin alyp qalady. Sonyń qatarynda Shákárimniń tósek-jabdyǵy da bar edi. Úıge Ahat Shákárimuly kelgende Sıraqbaı, Shahman esimdi aýyl aqsaqaldary jınalatyn. Sol kezde estigenim, Shákárimdi óltirgen kúni túnde NKVD-nyń máıitke kúzet qoımaǵanyn paıdalanyp, Baqanasta bolǵan aýyl azamattary máıitti urlap, eski qudyqqa aparyp tyǵady. Tańerteń NKVD shý shyǵaryp, barlyq aýyl adamdarynan jaýap alady. Alaıda, eshkimdi moıyndata almaıdy. Keter kezderinde aýyldastary qajynyń jeke múlikterin sol aýylda qalǵan jaqyn týysy retinde nemere aǵaıyny – meniń atam Qydyrǵa tabystap ketedi. Sol sebepti bizdiń úıde Shákárimniń tósegi, altyn belbeýi, oıý-órnekteri, óz qolymen jonyp jasalǵan shoqpary men saptyaıaǵy, taǵy basqa zattary boldy. Tósegi ádemi, temir burandaly, buzylyp jınalatyn edi. Sol tósekke atam qaıtys bolǵansha jatty. Onymen birge jatatyn bolǵandyqtan men de sol tósekte uıyqtap óstim. Qajynyń altyn belbeýin Qaraýylda, Abaı atamyzdyń bir toıynda Jıdebaıǵa aparyp qoıyp, sodan qaıtpaı qaldy. Ol kezde Shákárim aqtalmaǵan kez, atyn ataýǵa el qorqatyn. Shoqpary men saptyaıaǵyn atam Qydyr temeki ezip, nasybaı jasaýǵa paıdalandy. Men ony eshkimge bermeı, atamnan qalǵan mıras retinde saqtap júrdim. Alaıda ol týraly biletin adamdar kóp boldy», - dep birshama maǵlumat beripti Ernur Ázimbaev Semeıdegi mýzeı qyzmetkerlerine.
Abaı aýdanynyń týmasy 2016 jyly mýzeı qoryna ájesi Uljan Bájiǵulqyzynyń Shákárim jasaǵan úlgi boıynsha tikken kımeshegin de tabys etipti. «Jıdebaı-Bórili» memlekettik qoryq-mýzeıiniń ǵylymı hatshysy Shynar Sadyqova Shákárim qajynyń shoqpary men saptyaıaǵy qazirgi ýaqytta Abaı aýdanynyń ortalyǵy Qaraýyldaǵy ólketaný mýzeıine ýaqytsha qoıylǵanyn, qundy jádigerler aldaǵy ýaqytta mýzeı tórinen oryn alatynyn aıtty.
Azamat QASYM,
«Egemen Qazaqstan»
Shyǵys Qazaqstan oblysy, Abaı aýdany.
Sýret Abaıdyń memlekettik «Jıdebaı-Bórili» qoryq-mýzeıiniń baspasóz qyzmetinen alyndy