Igilikke jaraǵanyna aıdan asqan «Nurly jol» vokzalyna bizdiń de jolymyz túsken. Kórgenimiz ben kóńilge túıgenimiz kóp. Súısintken dúnıelerdi qaǵazǵa súıkesek, vokzal bir qaraǵanda, shyǵa kelseńiz, aınalańyz alaqandaǵydaı kórinetin el irgesindegi tóbe tárizdi. Qoǵamdyq kólikten túsip, ishine engende, úshinshi qabatqa – perronǵa bir-aq tap bolasyz. Aıta keteıik, osyndaǵy alty shoıyn jol aǵylǵan qyryqtan asa poıyzdy alyp kelip, Pavlodar, Qaraǵandy, Qostanaı jáne Kókshetaý baǵyttaryna silteıdi. Elordada ótip jatqan EKSPO kórmesine baılanysty qosymsha onnan asa poıyz taǵy bar. Mamandardan bilgenimizdeı, munda negizinen «Tulpar-Talgo» júrdek poıyzdary men qala mańyna qatynaıtyn elektropoıyzdar aıaldaıdy.
Eskalatormen joǵary kóterilgende, negizgi, tórtinshi qabat – kútý zalyna kiredi ekensiz. Dál osynda táýlik boıy jumys isteıtin bılet satý kassalary, elektrondy bılet alý termınaldary, múmkindigi shekteýli jandarǵa qyzmet etetin tereze, anyqtama bıýrosy, saýda núkteleri, telefon, smartfon qýattaıtyn qurylǵy, «Astana-taksı» qyzmeti bar. Besinshi qabat tamaqtaný oryndarymen jabdyqtalsa, altynshy qabatqa vokzal ákimshiliginiń keńseleri oryn tepken. Aıta keteıik, eger nysanǵa jeke kóligińizben keletin bolsańyz, birinshi, ekinshi qabattar – 740 oryndyq avtoturaq. Vokzal syrtynda 760 kólikke arnalǵan turaq taǵy bar. Baıqaǵanymyzdaı, munda jolaýshylar men shyǵaryp salýshylar demalyp, dúkenderdi aralap, tamaqtana alady. Kelýshilerdiń jaılylyǵy úshin qonaqúı, ana men bala bólmesi, júk saqtaý orny, ashana, medısınalyq qyzmet qarastyrylǵan. Múgedekter taktıldi tósenishterge jantaıyp, kózi nashar kóretinder Braıl álippesin qoldana alady. 52 eskalator men 26 lıft ornatylǵan. Jedel jumys isteıtin ǵalamtor jelisi tartylǵan. Qaýipsizdikke de kóp kóńil bólingen sııaqty. О́ıtkeni, ǵımaratta adamdardy tekseristen ótkizetin 16 kireberis pen aqyldy júıemen basqarylatyn 510 kamera ornatylǵan.
Ashylǵanyna endi ǵana aıdan asqan vokzalda halyqtyń qarasy qalyń. Jalpy kólemi 120 myń sharshy metr bolatyn nysanda jón silteıtin qyzmetkerlerdiń kóptigin de ańǵarý qıyn emes. Bizge joǵarydaǵy derekterdi jetkizip, mán-jaıdy áńgimelegen – keshen kezekshisi Madııar Amanbaev. Ol sońǵy úlgidegi dızaınmen jáne tehnologııamen jabdyqtalǵan mekemede 1700-ge tarta qyzmetker bar ekenin aıtty. «Jańa temir jol beketi kún saıyn 35 myńǵa jýyq jolaýshyny kútip alyp, shyǵaryp salýǵa qaýqarly. Al qazir táýligine nebári 7 myń jolaýshyny qabyldaımyz. Taǵy bir ereksheligimiz, júrdek poıyzdar alty qabatty bekettiń ishine kirip, jolaýshylarǵa qyzmet kórsetedi», deıdi M.Amanbaev. Mynaý málimet te bizdi beıjaı qaldyrmady: jańa vokzalda jańa tehnologııalar iske qosylǵan. Nysannyń shatyryna jınaqtalǵan jańbyr sýy tehnıkalyq qajettilikterge jáne jer telimin sýǵarýǵa jumsalady. Bul – «jasyl» tehnologııada qoldanylatyn eń ozyq jobalardyń biri. Aýa baptaý júıesi de tartymdy, ıaǵnı ǵımarattyń bir bóliginen ekinshi bóligine aýa almastyrylady. Sýyq bolyp turǵan zalǵa jyly aýa aıdalady da, vokzaldy jylytýǵa ketetin energııa únemdeledi. Sondaı-aq, munda jerdiń turaqty temperatýrasy arqyly aýany jylytýǵa múmkindik bar. Jerdiń tómengi aýa qabatyna radıator ornatylǵan, sol arqyly jazǵy maýsymda aýany salqyndatyp, qysqy ýaqytta jylytýǵa bolady eken. Avtomattandyrylǵan bul qurylǵy da energııany únemdeıdi. Mine, bas shahardyń TMD memleketterinde joq vokzalynyń jaǵdaıy men kórinisi osyndaı. Astanaǵa qosh keldiń, aǵaıyn! Jolyń bolsyn, jolaýshy!
Ashat RAIQUL, Sýretterdi túsirgen Erlan OMAROV, «Egemen Qazaqstan»