Astana kúni – kópshiliktiń asyǵa kútetin aıtýly merekesi. Táýelsizdiktiń shynaıy aıshyǵy retinde belgili Elordanyń eńseli keıpi, bıik tuǵyry árdaıym ulttyń asqaq rýhyn eske salyp turady. Árkim-aq Astana týraly maqtanyshpen oı tolǵap, syr bólisedi.
Astana kúnine oraı Taraz qalasyndaǵy «Balaýsa» aýla klýbynda «Astana – balalar kózimen!» atty baıqaý uıymdastyrylǵan bolatyn. Baıqaýǵa «Botaqan», «Araı», «Balaýsa», «Jas balǵyn» aýla klýbtarynyń jasóspirimderi men aýla klýb jetekshilerinen quralǵan barlyǵy otyzǵa jýyq adam qatysty.
Bul kúni jasóspirimder Astana týraly oılaryn qaǵaz betinde órnektep, sýret saldy. Árqaısysy Elordamyz jaıly oıyn bildirip, Astananyń negizgi aıshyqtaryn sýret túrinde bederledi. Máselen, bas shaharda ornalasqan Báıterek, Han Shatyr, Kerýen ortalyqtary da balalar qııalyna qanat bitirip, olardy erekshe bir kúıge bóledi. Ásirese, talapker jastar qazirgi kezeńde Astana qalasynda ótip jatqan halyqaralyq EKSPO – 2017 mamandandyrylǵan kórmesin de beıneledi.
Shyǵarmashylyqqa baǵyt alǵan balalardyń oıy men qııalynan týǵan Astana sýretteri kópshilikke tanystyrylyp, laıyqty baǵalaryn aldy. Astana – búginde elimizdegi ǵana emes, álemdegi de iri mádenı-rýhanı kelisimniń ordasy retinde qalyptasty. Balalar óz shyǵarmalarynda Elordamyzdyń osy bir ereksheligin de eskerip, óz týyndylaryna arqaý etti. Qazaqtyń boıynda qalyptasqan ıgi qasıetterdi Astana bolmysymen ushtastyra otyryp salǵan sýretteri kópshilikke jaqsy áser qaldyrdy.
Astana kúnine oraı Taraz qalasyndaǵy T.Rysqulov atyndaǵy ortalyq saıabaqta «Án-jyrym saǵan, Astana!» atty festıval ótip, festıval aıasynda baıqaý qorytyndysy jarııalandy. Nátıjesinde birinshi oryndy «Jas balǵyn», ekinshi oryndy «Balaýsa», al júldeli úshinshi oryndy «Araı» aýla klýbtary ıelendi. Jas sýretshilerge qala ákiminiń orynbasary Kenjebek Oljabaı sáttilik tilep, syı-sııapat kórsetti. О́ńir ónerpazdary ánnen shashý shashyp, Áýlıeata aspanyn ásem kúıge bóledi.
Hamıt Esaman,
«Egemen Qazaqstan»
Jambyl oblysy