«Azııa jańǵyryǵy» sırk festıvali bıyl onynshy ret ótkizilip otyr. Jyl saıyn Astana kúni qarsańynda ótkiziletin festıvalǵa Azııa, TMD elderinen sırk óneriniń maıtalmandary jıylady. Túrli pishinde, túrli qoıylymdarmen kórermenderge rýhanı azyq syılap júrgen dýmandy óner dodasy bıyl da óz dárejesinde uıymdastyryldy. 2-6 shilde aralyǵynda tórt kún boıy «Astanalyq sırkte» qaıtalanbas qoıylymdaryn tartý etti. Sırk óneriniń damyp, kórkeıip kele jatqanyna «Dıý Soleı» sırkiniń ónerin tamashalaǵan sonaý bir jyldary kózimiz jetken. Adamdardy qolǵa úıretilgen ańdarmen qyzyqtyrýdyń da birtindep qalyp bara jatqany baıqalǵan edi. О́ıtkeni, dúnıeniń bári qol sozymdaı jerde turǵandaı kórinetin mynaý jahandaný dáýirinde adamdardy tańǵaldyrý, sezimderin qozǵaý onsha ońaı sharýa emes. Sol úshin árbir eldiń aıtýly óner ıeleri jınalatyn festıvaldyń óziniń pishinin ózgertip turmasa, jurtty jalyqtyryp alý op-ońaı. Bıylǵy festıvalda basymdyq sırk ártisteriniń sheberligine, olardyń biregeı ónerine berildi. Astana sırki kúmbeziniń astyndaǵy akrobatıkalyq ushý qondyrǵysy, sırktegi manej-transformer, lazerli shoýǵa arnalǵan jabdyqtar túgelimen paıdalanyldy. Biregeılik demekshi, festıvaldyń alǵashqy kúninde óner kórsetken reseılik ataqty arqanmen júrýshi, 63 jastaǵy Vasılıı Peshkovtyń bes metrlik bıiktikten qulap ketýiniń ózi biregeılikke barabar boldy. Nege deseńiz onyń qulap ketkenin bylaıǵy kórermender sezbeı de qaldy. Qandaı trıýkterdi de qobaljymaı oryndap, qosymsha saqtyq arqanyn paıdalanbaı dar ústinde júretin Peshkovtyń sahnaǵa ár shyǵýy onyń ónerine qanyq kórermender úshin mereke. Sondaı-aq, festıvaldyń Gran-prı júldesin ıelengen monakolyq ekvılıbrıst Oleg Izosımovtyń óneri biregeıliktiń úlgisi boldy. Keńistikte dene tepe-teńdigin saqtaýda ártis úzdik óner kórsetti.
Jalpy, óz elimizden óner kórsetken, sondaı-aq, Mysyr, Monako, Qytaı, Reseı, Belarýs, Túrikmenstan, О́zbekstan men Qyrǵyzstannan kelgen dardyń ústinde, aspaly satylarda «belbeýler» nómirimen aýada «ushyp júrip» nemese kádimgi jýan-jýan taıaqtardy plastıkalyq sheberlikpen qoldanyp óner kórsetken sırk ártisteriniń osaly bolǵan joq. О́ner saıysynda «Astanalyq sırk» dırektory Erik Joljaqsynov tóraǵalyq etken, quramynda Krıvoı Rog memlekettik sırkiniń dırektory Sergeı Kabakov (Reseı), Belarýs memlekettik sırkiniń dırektory Vladımır Shaban, Sırk ártisteri qaýymdastyǵynyń dırektory Lolıta Lıpınska (Latvııa), «Erevan sırktiń» kórkemdik jetekshisi ári bas dırektory Djozef Sos Petrosıan (Armenııa), О́zbek memlekettik sırkiniń bas dırektory Bahtıer Týrsýnov (О́zbekstan), Vengrııa ulttyq sırkiniń kórkemdik jetekshisi Pıter Fekete (Majarstan) syndy sırk óneriniń maıtalmandary bar qazylar alqasy túrli elderden kelgen ártisterdiń ónerlerin sarapqa saldy. Sonymen, óner jarysynyń Gran-prı júldesi monakolyq ekvılıbrıst Oleg Izosımovke, altyn júlde «Orys taıaǵy» nómirine (jetekshisi Erlan Ázızov, Qazaqstan), «Tósem» nómirine (Maksım Vınogradov jáne Veronıka Rybchenko, Belarýs), «Belbeýler» nómirine (Parahat Orazlyev, Túrikmenstan), «Dińgek» nómirine (jetekshisi Konstantın Gvozdeskıı, Reseı), «Legıon» nómirine (jetekshisi Nurlan Alshynbaev, Qazaqstan) berildi. Al qyrǵyzstandyq Erkınbek Saralıevtiń «Solo jonglıaj» qoıylymy, ýkraınalyq Denıs Magolanyń jetekshiligimen týrnıkte óner kórsetýshiler, reseılik «Batýt» qoıylymy, ózbekstandyq Rýstam Hamatovtyń jetekshiligimen qoıylǵan «Belbeýler» nómiri kúmis júldemen marapattaldy. Festıvalǵa qatysqan ártisterdiń eshqaısysy da júldesiz qaıtqan joq. Qola júlde, Astana qalasy ákiminiń syılyǵy, «Kórermen kózaıymy», basqa da arnaıy syılyqtar barlyq qatysýshylarǵa buıyrdy.
Aıgúl SEIILOVA, «Egemen Qazaqstan»
Sýretterdi túsirgen Erlan OMAROV, «Egemen Qazaqstan»