Byltyr elordada 27 244 sábı dúnıege keldi, bul 2015 jylmen salystyrǵanda 8 paıyzǵa artyq, dep málim etti qalalyq densaýlyq saqtaý basqarmasynyń shtattan tys akýsher-gınekology Halıda Sháripova.
Onyń sózine qaraǵanda, elordada ana men bala ólimi kórsetkishiniń tómendeýine baǵyttalǵan memlekettik jumys halyq sanyn arttyrýǵa sep boldy. «Jalpy alǵanda Qazaqstan boıynsha ana ólimi kórsetkishiniń tómendeýi baıqalady. Máselen, Astanada 2016 jyly osy kórsetkishter100 myń sábıge shaqqanda 7,4 paıyzdy qurady. 3 jyl ishindegi tómendeý 12 paıyzdy qurady (2013 jyl-12,6 paıyz 100 myń sábıge shaqqanda). Bul bala týý kórsetkishiniń kóbeıgendigin bildiredi, sáıkesinshe elorda turǵyndarynyń sany artýda», -dedi H. Sháripova.
Onyń málimetterine qaraǵanda, sol kezeńde bala týý kórsetkishi 1 000 sábıge shaqqanda 7,5 paıyzdan 6,4 paıyzǵa deıin tómendedi. Boljam boıynsha bul qarqyn (ósim) osy jyly da saqtalady. «Qalada aıaǵy aýyr áıelderge qajetti jedel kómek kórsetý úshin barlyq jaǵdaı jasalýda. Degenmen biz kez-kelgen jaǵdaıǵa daıyn bolýǵa tyrysamyz. Qatarynan 3-4 patologııasy bar áıelder kezdesedi. Sondyqtan da dárigerler aıaǵy aýyr áıelderge tekserýden jıi ótip turýǵa keńes beredi», - dedi dáriger.
Halıda Sháripova atap ótkendeı, ana ólimi kóp jaǵdaıda aıaǵy aýyr bolǵan kezde týyndaıtyn qıynshylyqtar men bosaný kezinde kezdesetin aýyrtpalyqtarǵa baılanysty. Oǵan qosa buǵan júkti áıelderdiń aıaǵy aýyr kezinde qarapaıym erejelerdi ustanbaýy, mańyzdy elementterge salǵyrt qaraýy da sebep. Akýsher-gınekolog aıaǵy aýyr áıelderge júktiliktiń 12 aptasynda dárigerlik esepke turýǵa keńes beredi.
«О́kinishke qaraı, búginde áıelderdiń densaýlyq kórsetkishteriniń tómendigi baıqalýda. Bizdiń esepke sáıkes, stasıonarda bosanatyn áıelderdiń 20-23 paıyzy ǵana qıyndyqsyz dúnıege sábı ákeledi, qalǵan jaǵdaılarda qıyndyqtar kezdesedi. Bul áıelderdiń densaýlyǵynyń nasharlyǵyn, tómendigin bildiredi. Osy oraıda turǵyndarǵa, ásirese dúnıege urpaq ákeletin áıelderge dárigerge turaqty túrde qaralyp, ýaqytynda emdelýge keńes beremiz», - dedi H. Sháripova.