Jarystyń sońǵy kúninde sprınterler úshin báseke sátti boldy. Áıelder arasynda 200 metrge júgirgen otandasymyz Vıktorııa Zıabkına osy maýsymdaǵy Azııanyń úzdik nátıjeni kórsetip, altyn medal jeńip aldy. Onyń ýaqyt kórsetkishi – 23.10 sekýnd. Márege ekinshi bolyp Shrı-Lanka sportshysy Rýmeshıka Kýmarı keldi. Úzdik úshtikti taǵy bir jerlesimiz Olga Safronova (23.47 sek) qorytyndylady.
– Vıktorııa bir kún buryn estafetada júgirgen soń azdap sharshap qaldy. Sondyqtan, sprınetrlik jarystaǵy start basynda baıaý qımyldady. Degenmen búgin óziniń qandaı jelaıaq ekenin azııalyq jeńil atletıka jankúıerlerine kórsete bildi. Negizi, 200 metrge júgirýde jeńimpazdyń kim bolatyny kóbinese ara qashyqtyqtyń jartysynan asqannan keıin sheshilip jatady. Sondyqtan, Vıktorııa árdaıym márege jaqyndaǵanda kúsh alady. Negizinen ol jarystardy únemi osylaı jeńip júredi, – deıdi Zıabkınanyń jattyqtyrýshysy Lıýbov Nıkıtenko.
Sóıtip, Vıktorııa Zıabkına 2017 jylǵy Azııa chempıonatynyń úsh dúrkin chempıony atandy. Ol buǵan deıin jekeleı synda 100 metrge júgirýden jeńiske jetse, áriptesteri Rıma Kashafýtdınova, Svetlana Golendova, Olga Safronovamen birge 4h100 metrge júgirý boıynsha komandalyq estafetadan úshinshi altyndy ıelendi.
Aıta keteıik, 8 shilde kúni qazaqstandyq jeńil atletter 100 metrge komandalyq estafetaǵa júgirýde saryqurlyqta ózderine teń keler eshkim joq ekenin dáleldegen edi. Qazaqstan Ulttyq quramasynyń ýaqyt kórsetkishi – 43.53 sekýnd boldy. Ekinshi orynda Qytaı qyzdary (44.50) bolsa, úshtikte Úndistan (44.57) quramasy endi.
Tórtinshi altyndy úsh qarǵyp sekirýden Marııa Ovchınnıkova enshiledi. Ol Azııa chempıonatyn 13.72 metrmen qorytyndylady. 18 jastaǵy jeńil atlet 4-13 tamyz aralyǵynda Londonda ótetin álem chempıonatyna joldama aldy. Marııadan bólek, dál osy saıystan taǵy bir qazaqstandyq sportshy Irına Ektova kúmis medal jeńip aldy. Ol 13.62 metrge sekirgen.
Azııa chempıonatynan sprınter Olga Safronovaǵa eki medal buıyrdy. Ol 100 metrge júgirýden (11.45 sekýnd) kúmis, 200 metrde qola júlde enshiledi. Taǵy bir qola medaldi jarystyń ekinshi kúninde ıadro laqtyrýdan Ivan Ivanov oljalaǵan bolatyn. Ol Iran men Úndistan sportshylaryn alǵa jiberip, 19.41 metrge laqtyryp, úshinshi orynǵa qol jetkizdi.
Osylaısha, Bhýbaneshvardaǵy Azııa chempıonatynan Qazaqstan Ulttyq quramasyna jalpy sany segiz medal buıyrdy. Sóıtip, jalpy komandalyq esepte úshinshi orynǵa jaıǵasty. Kóshbasynda jarys qojaıyny Úndistan 29 medal (12 altyn, 5 kúmis, 12 qola) men Qytaı (8 altyn, 7 kúmis, 5 qola) bar. Al, 2015 jylǵy Azııa birinshiliginde qazaqstandyq sportshylar bir altyn, úsh kúmis jáne úsh qola medalmen jalpy esepte toǵyzynshy orynmen shektelgen.
6-9 shilde aralyǵynda ótken bıylǵy Azııa chempıonatyna saryqurlyqtyń 43 elinen 800-den astam sportshy qatysty. Jeńil atletıkadan Qazaqstan Ulttyq quramasy endi tamyz aıynda Londonda ótetin álem chempıonatyna qatysady.
Álı BITО́RE,
«Egemen Qazaqstan»