Ekinshi shara retinde Iýnýs Emre atyndaǵy túrik mádenıet ortalyǵy «Qazaqstan – Túrkııa dostyq áýenderi-2» atty konsertti astanalyqtar men EKSPO-2017 qonaqtaryna tartý etpek. Dál osy taqyryppen 2016 jylǵy 26 qazanda Qazaqstan Táýelsizdiginiń 25 jyldyǵyna arnalǵan konsertti qala halqy úlken qoshemetpen tamashalaǵan bolatyn. Konsertte Dımash Qudaıbergenov, Kámshat Joldybaeva, Gúlnur Orazymbetova, Aqerke Tájibaeva, Hanzada toby óner kórsetken bolatyn.
Atalǵan sharanyń jalǵasy retinde Túrkııanyń Mádenıet jáne týrızm mınıstrligine qarasty «Túrki álemi mýzykalyq ansambli» jáne Astana qalasy ákimdiginiń «Memlekettik akademııalyq fılarmonııa» orkestriniń súıemeldeýimen ótetin konsertte ánder shyrqalyp, kúıler tartylady. Qos orkestrdiń tizgini Avstrııada bilim alǵan dırıjer, «Altyn taıaqsha» dırıjerlar baıqaýynda Gran-prı júldesin oljalaǵan Ernar Nurtazınde bolady. Kúmis kómeı ánshiler Chıdem Gúrdal men Djem Gúrdal qazaqtyń tanymal «Dýdaraı», «Qarlyǵash» sııaqty ánderin qos orkestrdiń súıemeldeýimen shyrqaıdy.
Konsertte qazaq jáne túrik tilderinde án oryndaıtyn tanymal solıster Chıdem Gúrdal men Djem Gúrdal shara týraly óz oılaryn bólisken edi.
«Biz EKSPO-ǵa arnap eki konserttik baǵdarlama daıyndadyq. Alǵashqysy 20 shildede Astana konsert zalynda saǵat 19.00-da, ekinshisi 21 shilde kúni EKSPO alańyndaǵy Túrkııa ulttyq pavılonynda saǵat 17.00-de ótedi. Eki tilde shyǵarmalar oryndaımyz. Astanaǵa kelip EKSPO-ny aralap, tamashalaý úshin taǵatsyzdanyp otyrmyz», dedi.
20 shildede bolatyn konsertte kórermenderge arnaıy lotoreıa taratylyp, Túrik áýe joldary «Turkish Air» tarapynan beriletin Ystanbulǵa baryp qaıtý bıletteri oınatylady. Túrkııaǵa tegin joldamany árbir kórermen utyp alý múmkindigine ıe.
Baýyrlas túrik eliniń tek qana óner adamdary ǵana emes, EKSPO-2017 kórmesine oraı ótkiziletin osy sharaǵa Túrkııanyń ulttyq arnasy TRT men Qazaqstanda jumys istep jatqan «Kazstroıpodrıad» sııaqty kompanııalary da demeýshi retinde ózindik úlesterin qosýda.
Astanalyqtar men qala qonaqtary aqysyz tamashalaı alatyn konsert 20 shilde kúni saǵat 19.00-da Astana konsert zalynda (Beıbitshilik kóshesi 1/1) ótedi.