Qazaqstan Prezıdenti qazirgi kezde sıfrlyq tehnologııalardy engizýdiń mańyzdylyǵyna toqtalyp, bul rette kıber qaýip-qaterge jáne aqparattyq tehnologııalardy zańsyz paıdalanýǵa qarsy turý qajettigin atap ótti.
– Aqparattyq-kommýnıkasııalyq tehnologııalar adam ómiri men memlekettiń barlyq salasynda kezdesedi. Sondyqtan men «Qazaqstannyń úshinshi jańǵyrýy: jahandyq básekege qabilettilik» atty joldaýda sıfrlyq tehnologııalardy damytý maqsatyn qoıdym. Onyń paıdasy zor, biraq ony engizýmen birge kıbershabýyldar jasaý qaýpi de týyndaıdy. Sol sebepten Qazaqstan oǵan daıyn bolýǵa tıis, – dedi Elbasy.
Nursultan Nazarbaev jıynǵa qatysýshylar nazaryn elimizdegi jáne álemdegi terrorıstik toptardyń destrýktıvti áreketteriniń saldarlaryna aýdaryp, olarǵa qarsy tıimdi jumystar júrgizýdi bir jolǵa qoıý qajettigin aıtty.
Sońynda Memleket basshysy birqatar naqty tapsyrma berdi.