Saǵat 18:06-da tirkelgen mıllıonynshy kelýshi Qazaqstan Respýblıkasy Táýelsizdiginiń 25 jyldyǵyna arnalǵan arnaıy monýment jaqtaǵy kireberiste tirkelgeni anyqtaldy. Ol elordadaǵy №76 mektep-lıseıdiń matematıka pániniń muǵalimi Gúljıhan Jańabergenova eken... «Men bas qalamyzda uıymdastyrylǵan, kúlli álem kóz tikken sharanyń mıllıonynshy kelýshisi bolǵanyma óte qýanyshtymyn. Jer betindegi 35 memlekette ótken EKSPO-nyń bıyl Qazaqstanda ótip jatqanyn maqtan tutamyn», dedi ol jýrnalıstermen kezdesýinde.
Mıllıonynshy kórermendi «Astana EKSPO-2017» ulttyq kompanııasynyń basshysy Ahmetjan Esimovtiń ózi qarsy alyp, «Dıý Soleı» sırkine bıletter men planshet syıǵa tartty. «Bizdiń ulttyq kompanııa úshin búgin mańyzdy kún. Biz josparlaǵandaı, kórmege keletin 2 mıllıon adamnyń barlyǵy tirkeldi. Biz ár kún saıyn kelýshilerdiń sanyn baqylap, boljap otyramyz.
Mine, kórmeniń 31-shi kúni mıllıonynshy kórermenimiz tabaldyryǵymyzdy attady. Mundaı aýqymdy ulttyq jobany tamashaýǵa degen qyzyǵýshylyq kún sanap ósý ústinde. Búgingi kórsetkish te bizdi qýantady», – degen A.Esimov mıllıonynshy kórermenge aq tilegin jetkizdi. «Men Astanada turamyn, osynda jumys isteımin. Kórmege ekinshi ret otbasymmen kelip otyrmyn. Birinshi ret áriptesterimmen daıyndyq kezinde kelgen edim. Ol kezde ózimizdiń «Nur álem» pavılony ashylmaǵan edi. Osy joly Qazaqstannyń pavılonyn tamashalasaq pa degen nıetimiz bar», deıdi Gúljıhan Jańabergenova. «Men osy shara jańa tehnologııalar, serpindi ıdeıalar ákeledi dep kútemin. EKSPO-nyń nátıjesi orasan zor jetistiktermen elimizge paıda ákeledi dep senemin. О́ıtkeni, barlyq qatysýshylar eń úzdik ónertabystaryn, jasyl tehnologııadaǵy jetistikterin ákeldi munda», – deıdi mıllıonynshy klıent.
Ashat RAIQUL, «Egemen Qazaqstan» Sýretti túsirgen Erlan OMAROV, «Egemen Qazaqstan»