Biz ómirdiń ashy-tushysyn tatqan urpaqpyz. HH ǵasyrdyń barlyq zobalańy basymyzdan ótti desem ótirik bolmas. Keshegi Uly Otan soǵysynda etigimizben qan keship júrip týǵan jerimizdi qorǵadyq. Odan keıingi jyldarda da bel jazbaı eńbek ettik. Qurylys salasynda eńbek jolymyzdy qarapaıym jumysshydan bastap, sońynda memleket úshin mańyzdy qyzmetterge deıin atqardyq. Biz adal eńbek, mańdaı termen tapqan nannyń tátti bolatynyn jan-tánimizben uǵyp ósken urpaqpyz. Qandaı qıynshylyqpen ótkizse de árkimge óziniń jastyq shaǵy qymbat qoı. Biraq shynymyzdy aıtaıyq, toqsannan asqan biz úshin dál osy kezeńniń, dál osy kúnderdiń qadiri erekshe bolyp tur. «Átteń, baıaǵy jas kúnimiz bolsa, tarıhtyń jańa betterine jazylyp jatqan búgingi jasampaz oqıǵalardyń bel ortasynda júrer edik!» dep qoıamyz. Elde, sonyń ishinde bizdiń Batys Qazaqstan óńirinde jasalyp jatqan árbir oń ózgeriske balasha qýanamyz! О́zimiz topyraǵyn basyp, aýasyn jutyp júrgen Aqjaıyq óńirindegi ahýaldy ǵana aıtaıyqshy: Bıyl Batys Qazaqstan oblysynda «Nurly jol» baǵdarlamasy aıasynda 33 joba júzege asyrylyp jatyr eken! Oblys turǵyndarynyń 93 paıyzdan astamy tabıǵı gazdyń ıgiligin kórip otyr. Bıyl taǵy da 35 eldi mekenge gaz qubyry tartylmaq. Oral óńiri tezek tasyp, kúl shyǵarý beınetinen múldem qutyldy dese de bolady. Úıge kirgen tabıǵı gaz – órkenıettiń ózi emes pe? Osy gazdyń arqasynda qazir qaladaǵy úı men aýyldaǵy úıdiń esh aıyrmasy bolmaı qaldy. Azýyn aıǵa bilep, ǵaryshqa adam ushyrǵan Keńes Odaǵy tusynda da Batys Qazaqstan oblysynda jol máselesi qıyn jaǵdaıda bolyp edi. Qazir she?! Bıyldyń ózinde bizdiń óńirde 500 shaqyrym jol jańadan salynyp jatyr! Onyń 200 shaqyrymy – respýblıkalyq mańyzy bar baǵyttar. Jol qurylysy asa qymbat, qarjyny kóp qajetsinetin sala ǵoı. Munyń báriniń respýblıka qazynasynan bólinip, aımaq turǵyndarynyń ıgiligi úshin ortalyqtan jasalǵan qamqorlyq ekeni sózsiz. Jaqynda «Egemen Qazaqstan» gazetinde «Toqsan aýylda toı bolady» dep jazypty. Áńgime bizdiń Batys Qazaqstan óńiri týraly. Kógildir otyn kelse, taza aýyzsý tartylsa, taqtaıdaı tegis jol tússe, árıne, aýyldyqtar úshin toı ǵoı! Budan artyq qandaı qamqorlyq kerek. Eńbek adamy úshin, qarapaıym sharýa úshin aspan ashyq, beıbit kún bolsa, adal eńbek etip, zeınetin kórý múmkin bolsa, odan artyq baqyttyń keregi joq! О́zińiz qabyldaǵan «Nurly jer» baǵdarlamasy aıasynda bıyl bizdiń oblysta kóp qabatty 11 úı salynyp jatyr. Bul turǵyn úılerdiń qurylysyna 10 mlrd teńgeden astam qarjy bólingen. Buǵan qosa, aýdandarymyzda júzdegen úıdiń qurylysy qolǵa alynýda. Jalpy alǵanda, bıyl oblys aýmaǵynda 17 kóp páterli turǵyn úı salynyp jatyr eken. Munyń barlyǵy halyqtyń ál-aýqatyn jaqsartýǵa baǵyttalǵan, turǵyn úıge, baspanaǵa muqtaj azamattar úshin jasalyp jatqan memlekettiń qamqorlyǵy ekeni anyq. Baspana zaryn tartqan bir adam óz shańyraǵyna ıe bolǵanda qalaı shattanady deseńizshi! Al bizde jyl saıyn myńdaǵan jan jańa páterge kirip, qonys toıyn toılap jatyr. Budan artyq qýanysh, budan artyq baqyt bar ma? Alla taǵala bergen densaýlyqtyń arqasynda toqsannan assaq ta toptan qalmaı kelemiz. Jaqynda ǵana birqatarymyz Batys Qazaqstan oblystyq Ardagerler keńesi quramynda Astana qalasyna sapar shegip, álem moıyndaǵan EKSPO-2017 halyqaralyq kórmesin tamashalap qaıttyq. Álemniń ár túkpirinen kelip, Astanamyzdyń aı sáýletine tańdaı qaqqan sheteldikterdi kórip, kári keýdemizdi maqtanysh kernedi. Alla taǵala bizge Jambyl babanyń qabiletin, sýyrypsalma aqyndyǵyn bermegen, áıtpese, jyrlap-aq jiberetin jer edi! El tizginin ózińiz ustap, Qazaqstan memleketin álemdik saıasattyń aıdynynda jahanǵa úlgi etip júrgizip kelesiz. Elimizde qoǵamdyq turaqtylyq bar, ekonomıka qarqyndy ósip keledi. Halyqtyń ál-aýqaty jyl sanap artýda. Qazaqstannyń bedeli halyqaralyq deńgeıde jyldan jylǵa kóterilýde. О́zimiz turatyn Batys Qazaqstan óńirindegi jaǵdaıdy joǵaryda aıtyp óttik. Osynyń bári ońaılyqpen kelmeıtinin biz, aǵa urpaq, jaqsy túsinemiz. Bul – uıqysyz túnderdiń jemisi, asqan kóregendiktiń kórinisi, sarabdal saıasattyń nátıjesi. Sol úshin de ýaqyt aǵartqan appaq basymyzdy ıip, búkil Aqjaıyq óńiri halqy atynan sizge atalyq alǵysymyzdy aıtamyz! Aman bolyńyz, uzaq jasańyz! Oıǵa alǵan arman-maqsattaryńyzǵa jete berińiz! Biz Astana men Qazaqstannyń Tuńǵysh Prezıdentin bir-birinen bólip qaraýǵa bolmaıtyn egiz uǵym dep túsinemiz. Astana – sizdiń týǵan perzentińiz sııaqty. Astana – keń-baıtaq Otannyń, qasıetti Qazaqstannyń júregi ispetti. Mereke qutty bolsyn, qadirli Elbasy!
Uly Otan soǵysynyń ardagerleri: Muhtar ÁJǴULULY, Hamza ÁBDIRAHMANULY, Halam JUMAShULY, Mınjan ǴABDOLULY, Ibat ABDOLULY
Batys Qazaqstan oblysy