Tahaýı Ahtanov atyndaǵy oblystyq drama teatrynda Qazaqstan Prezıdenti mádenıet ortalyǵynyń «Ulttyq dástúrler teatrynyń» «Báıterek» spektakliniń qoıylymy ótti. Eki kún qatarynan qoıylǵan spektaklge jurtshylyq kóp jınaldy. Spektaklde Elbasy Nursultan Nazarbaevtyń ádebı beınesi aıshyqty shyqqan. Elbasynyń adamı tolǵanysy, minez-qulqy, bitim-bolmysy sıýjettik kórinisterge arqaý bolǵan.
– Bul teatrdyń gastroldik saparmen bıyl ekinshi ret shyǵýy. Munyń aldynda Pavlodarda bolǵanbyz. Bul qoıylymda Elbasynyń beınesin jasaýmen birge, táýelsizdigimizdiń búgingi jetken bıigin ashýǵa tyrystyq. Qoıylymda bári bar, bı de, án de, halqymyzdyń sýyrypsalma aqyndyq óneri de kórinis tabady. Bul spektakl sıntezdik óner týyndysy. Osylardyń bári Elbasynyń beınesin ashýǵa qyzmet etedi. Elbasy atqarǵan qyrýar jumystar spektakldi kórgende kóz aldyńa kele qalady,–deıdi teatrdyń rejısseri Sáýlebek Asylhanov.
Satybaldy SÁÝIRBAI, Aqtóbe oblysy.