Álemdik dodaǵa elimizdiń atynan synǵa túsken Sábına doppen jattyǵý saıysynda 16.850 upaı jınap, jarystyń kúmis júldesin ıelendi. Altyn medaldy reseılik Ekaterına Seleznıova – 17.450 upaı kórsetkishimen jeńip aldy. Al úzdik úshtikti Belarýs qyzy Galkına Katerına qorytyndylady. Onyń nátıjesi – 16.450 upaı. Sondaı-aq, Álııa Iýsýpovanyń shákirtteri jaqynda elordadaǵy «Dáýlet» tennıs ortalyǵynda uıymdastyrylǵan kórkem gımnastıkadan senorlar arasyndaǵy toǵyzynshy jáne jasóspirim qyzdar arasyndaǵy HV Azııa chempıonatyna qatysyp, jalpy sany 12 medal ıelengen edi. Azııa birinshiligine saryqurlyqtyń 14 elinen kelgen 153 sportshy óz baqtaryn synaǵan bolatyn. Chempıonattyń alǵashqy kúnindegi komandalyq jarysta Qazaqstan quramasy sapynan Rıo Olımpıadasyna qatysqan Sábına Áshirbaeva, sondaı-aq, Álına Ádilhan, Anna Afýksenıdı jáne Selına Jumataevalar qatysyp, Azııa chempıony atandy. Al jekeleı synda doppen jáne sheńbermen jattyǵý saıysynda Sábına Áshirbaeva altyn medal ıelense, sheńbermen jattyǵýda Álına Ádilhanova men toptyq básekede el namysyn qorǵaǵan Regına Sultanova, Daıana Jaqypova, Ánel Talǵatbek, Kámıla Kóptileý, Arýjan Qazbekova, Dınara Erǵalıevalar chempıonattyń qola júldegeri atandy. Sonymen qatar, jasóspirimder arasyndaǵy komandalyq básekede Qazaqstan quramasy sapynan synǵa túsken Ádılıa Tilekenova, Roza Ábitova, Daıana Ábdirbekovalar Azııa chempıonatynyń altyn medalin ıelendi. Toptyq kezeńde jarysqa túsken Saǵına Muratqyzy, Aıza Rústemqyzy, Darııa Sharafıdenova, Dilnaz Musabekova, Raıana Súleımen jáne Renata Joldynovalar kúmis júldeger atandy. Úsh kúnge sozylǵan Azııa chempıonatynda Qazaqstan Ulttyq quramasy jalpy sany 12 medal ıelendi. Onyń altaýy altyn, ekeýi kúmis jáne tórteýi qola. Aıta keteıik, kórkem gımnastıkadan jyl saıyn ótetin Azııa chempıonaty bıyl Qazaqstanda osymen tórtinshi ret uıymdastyryldy.
Álı Bıtóre,
"Egemen Qazaqstan"