Jýyrda tarazdyq tyńdarmandar áıgili ónerpazben júzdesip, ánderin tyńdady. Taraz qalasyna arnaıy kelgen ol T.Rysqulov atyndaǵy ortalyq saıabaqta jurtshylyqpen júzdesip, qoshemetke ıe boldy. «Kóne Taraz» tarıhı-mádenı kesheninde bolyp, Áýlıeatanyń búgingi kelbetimen tanysty. Álemdik sahna sańlaǵy ótken shaqtarynan qyzyqty estelikter aıtyp, kópshilikke jaqsy áser syılady. Negizi Robertıno Lorettı elimizge Astana tórinde ótip jatqan EKSPO-2017 halyqaralyq mamandandyrylǵan kórmesiniń qurmetine oraı kelgen eken. Astana shaharynan soń Taraz qalasyna arnaıy kelýdi jón sanaǵan ánshi Qazaqstanǵa ár kelgen saıyn úlken áserde bolatynyn jetkizdi. «Men Qazaqstanǵa birinshi ret kelip otyrǵan joqpyn. Osydan týra on jyl buryn da qazaqstandyq tyńdarmandarmen qaýyshqanym el esinde shyǵar. Tarıhı Taraz qalasynda da bolǵanmyn. Araǵa on jyl salyp qaıta kelgenimde, Taraz qalasynyń aıtarlyqtaı ósip, órkendegenin baıqadym. Sondaı-aq, Astana qalasynda ótip jatqan EKSPO kórmesi meni keremet áserge bóledi. Astananyń tańǵajaıyp qalaǵa aınalǵanyn kórip, tamsandym», dedi ónerpaz. Kezinde álem tyńdarmandaryna «Jamaica», «O sole mio», «Ave Maria» sekildi ánderimen tanymal Lorettı kóńil túkpirinde júrgen kópshilikke beımálim oılarymen de bólisti. Ásirese, kópshilikti qyzyqtyrǵany, ol óziniń 1960 jyly alǵan altyn tabaqshasyn Elbasy Nursultan Nazarbaevqa syıǵa tartqysy keletin nıetiniń bar ekenin aıtqany boldy. Sondaı-aq, ol óziniń ánshilik ónerine jýyq arada núkte qoıady eken. Qazaq elin qurmetteıtin ol Astana qalasynda ótetin shyǵarmashylyq keshinde sońǵy ret án shyrqaıtynyn jetkizdi. Hamıt ESAMAN, «Egemen Qazaqstan»
Jambyl oblysy