Áýeli Qoǵamdyq kelisim keńesiniń tóraǵasy, «Nur Otan» partııasy Jambyl oblystyq fılıaly tóraǵasynyń orynbasary Shábden Tileýmurat atalǵan keńestiń atqarylǵan jumystaryna toqtaldy. «Qazaqstan halqy Assambleıasynyń HHV sessııasynda Elbasy Nursultan Nazarbaev Qoǵamdyq kelisim keńesteriniń mańyzdylyǵyn erekshe atap ótken bolatyn. Bul keńester jalpyulttyq ámbebap pikirtalas alańyna aınaldy. Sondaı-aq bılik pen turǵyndar arasyndaǵy bedeldi qurylym halyqqa qyzmet etip keledi» dedi Shábden Toqtasynuly óz sózinde.
Qazirgi tańda Jambyl oblysynda 175 Qoǵamdyq kelisim keńesi jumys isteıdi. Olardyń ishinde oblysta 1, qalada 2, aýdandarda 10, aýyldarda 153 jáne iri mekemelerde 9 keńes qyzmet etedi. Atalǵan kásiporyndar qataryna «Qazfosfat» jaýapkershiligi shekteýli seriktestigi, «Tarazenergo» aksıonerlik qoǵamy, «Jambyl Jylý» jáne «Taraz-Sý» kommýnaldyq memlekettik mekemeleri kiredi. Qoǵamdyq kelisim keńesteriniń jalpy músheler sany búginde 1025-ke jetip otyr.
Keńes otyrysynda Jambyl oblysy Qazaqstan halqy assambleıasy Qoǵamdyq kelisim keńesi tóraǵasynyń orynbasary, oblystyq bilim basqarmasynyń ádisnamalyq kabınet meńgerýshisi Bıgeldi Tájibaev baıandama jasap, «Máńgilik El» jalpyulttyq ıdeıasy aıasynda bilim alyp jatqan balalarǵa patrıottyq tárbıe berýdi arttyrý máselesin aıtyp ótti. Al Jambyl oblysy Qazaqstan halqy assambleıasy hatshylyǵynyń bas mamany Ultýar Babaqulova Jambyl, Baızaq, Talas jáne Sarysý aýdandaryndaǵy Qoǵamdyq kelisim keńesteriniń jumys barysyn baıandady.
Otyrys sońynda qatysýshylar pikir almasyp, Qoǵamdyq kelisim keńesteriniń jumysyna qatysty usynystaryn jetkizdi.
Hamıt Esaman,
«Egemen Qazaqstan»
Jambyl oblysy