Respýblıkanyń kúsh jáne quqyq qorǵaý qurylymdarynyń, mınıstrlikter men vedomstvolardyń basshylarymen birge, qurmetti qonaqtar qatarynda sheteldik elshilikter delegasııalarynyń jetekshileri, sheteldik arnaýly qyzmet ókilderi men ardagerleri boldy.
Qazaqstan Prezıdenti elimizde beıbitshilik pen turaqtylyqty saqtaý úshin óz ómirin qurban etken UQK qyzmetkerleriniń eńbekterin erekshe atap ótip, olardy bir mınýt únsizdikpen eske alýǵa shaqyrdy.
Memleket basshysy Dostastyq elderiniń qaýipsizdik organdarynyń basshylaryna Qazaqstandaǵy áriptesterimen tyǵyz baılanys ornatyp, ózara jemisti is-qımyl jasap kele jatqany úshin alǵys aıtty.
Nursultan Nazarbaev Qazaqstannyń táýelsizdik jyldaryndaǵy jetistikterine toqtalyp, ulttyq qaýipsizdik organdary qyzmetkerleriniń memleketimizdiń egemendigi men konstıtýsııalyq qurylymyn saqtaýdaǵy rólin atap ótti.
– Biz «Qazaqstan-2050» strategııalyq baǵdarlamasyn iske asyrýdamyz. Onyń maqsaty – álemniń ozyq damyǵan otyz eliniń qataryna ený. Oǵan tabysty qol jetkizýdiń basty sharttary – tóńiregimizde beıbit ómir men tynyshtyqty qamtamasyz etý, sondaı-aq Qazaqstan qoǵamynda ishki saıası turaqtylyq pen kelisim ornatý, – dedi Elbasy.
Qazaqstan Prezıdenti elimizdiń egemendigi men aýmaqtyq tutastyǵyn qamtamasy etý úshin kúresken qaharman babalarymyzdyń erligin este saqtaýdyń mańyzdylyǵyn aıtty.
Memleket basshysy qoǵamymyzǵa qarsy baǵyttalǵan teris ıdeologııa men destrýktıvti aǵymdardyń jolyn kesý jónindegi is-qımyldyń qajet ekenin atap ótti.
– Halyqaralyq terrorıstik jáne dinı-ekstremıstik uıymdarǵa arqa súıegen radıkaldy toptardyń zalym áreketteri ulttyq qaýipsizdigimizge eleýli qaýip-qater tóndirip otyr. Bul zulmatpen ymyrasyz kúres júrgizýge búkil Qazaqstan qoǵamy tolyq qoldaý kórsetýde. Osy joǵary senimdi teris ıdeologııa men destrýktıvti aǵymdardyń jolyn qatań túrde kesý jónindegi júıeli ári tıimdi qyzmet etý arqyly aqtaý qajet, – dedi Nursultan Nazarbaev.
Sonymen birge, Elbasy aqparattyq jeliler men resýrstarǵa hakerlik shabýyldar jasaý sııaqty jahannyń jańa qaýip-qaterlerin atap, «Qazaqstannyń kıberqalqanyn» qurýdyń ózektiligine toqtaldy.
Qazaqstan Prezıdenti jahandyq qaýipsizdiktiń jańa qaterleriniń paıda bolýyna ákep soǵatyn álemdik damýdaǵy teńsizdikterdiń saldarlaryna da nazar aýdardy.
– Azyq-túlikke, aýyz sýǵa, medısınalyq kómekke qol jetkizý problemalarynyń órshýi aıasynda álemdik damýdaǵy teńsizdik asa qaýipti jaǵdaı týǵyzýda. Bul tutas qurlyqtar men óńirlerdi qamtyǵan jahandyq mıgrasııaǵa ákep soqtyrdy. О́zine jáne otbasyna jaqsy ómir izdegen adamdardyń arasynda terrorıster men qylmyskerler, úgitshiler men esirtki satýshylar da jasyrynýy múmkin, – dedi Memleket basshysy.
Nursultan Nazarbaev álemniń qazirgi barlyq syn-tegeýrinderi men qaýip-qaterlerine qarsy turý úshin UQK qyzmetkerleriniń kásibı qabileti men biliktiligin jetildirý qajettigin atap ótti.
– Jyl basynda Ulttyq qaýipsizdik komıteti men onyń vedomstvolarynyń jańa qurylymy bekitildi. О́zara is-qımyl jasaý men kúsh-qýatty qaıta ornalastyrýdyń jańartylǵan júıesi meılinshe tıimdi jumys júrgizýge múmkindik beredi. Ulttyq qaýipsizdik komıtetiniń qyzmetkerleri aldaǵy ýaqytta da Otanymyzǵa minsiz qyzmet etip, elimizdi kórkeıtý jáne ulttyq múddemizdi qorǵaý jolynda ózderiniń barlyq kúshin, bilimi men tájirıbesin jumsaıtynyna senimdimin, – dedi Elbasy.
Sońynda Qazaqstan Prezıdenti qyzmettik paryzyn oryndaýda erlik men jankeshtilik kórsetken ulttyq qaýipsizdik organdarynyń úzdik qyzmetkerlerine ordender men medaldar tabys etti. II dárejeli «Aıbyn» ordenimen E.Kósherbaev (marqum), Á.Saryqulov, «Jaýyngerlik erligi úshin» medalimen UQK qyzmetkerleri – D.Bazarbaev, A.Qojabekov, A.Luqpanov, J.Omarıev, Á.Tastambekov, E.Úsenov marapattaldy.
Marapattaý rásiminen keıin Ulttyq qaýipsizdik komıtetiniń 25 jyldyǵyna arnalǵan saltanatty konsert ótti.