Baıqaýǵa Qazaqstan Respýblıkasymen qatar, Ázirbaıjan, Chılı, Kosovo, Chernogorııa, Grýzııa, Belarýs, Argentına, Albanııa, Makedonııa, Qyrǵyzstan, Fılıppın, Qytaı, Bosnııa jáne Gersegovına, Kıpr, Moldova, Bashqurtstan, Úndistan, Rýmynııa, Tatarstan jáne Bolgarııa syndy 21 memleketten bı ujymdary qatysyp, óz eptilikteri men myqtylyqtaryn tanytty. Bı qımylymen tilsiz óner baılyǵyn pash etken ár eldiń daraboz bıshileri ishinen kóshbasshy oryndy qazaqstandyq «Qazyna» bı ansambline berse, ekinshi orynǵa Moldova memleketiniń ónerpazdary laıyq dep tanylyp, «Kúmis Qarakóz» júldesi buıyrdy. «Qola Qarakóz» atalymyna ıe bolǵan Grýzııanyń bı ujymy úshinshi orynnyń júldesin óz eline arqalaı qaıtty.
Atalǵan bı baıqaýynyń maqsaty - halyqaralyq óner ujymdarynyń biregeıin anyqtaý jáne ózara qarym-qatynasty arttyrý bolsa, saıysqa qoıylǵan talap deńgeıi de kúrdeliligimen erekshelendi. Bı tobynyń sahna mádenıeti men árbir qımyl-qozǵalysy, mýzyka yrǵaǵymen baılanysy men óz memleketiniń ulttyq naqyshyn beıneleıtin kıim úlgisi qazylar alqasynyń nazarynan tys qalmady. Doda barysyndaǵy egjeı-tegjeıli zerdeleý men bı taktıkasynyń sáttilikpen oryndaý sheberligin saraptaý, kil myqtylardyń aıryqsha sıpattary men óner álemindegi bıiktikterin ańǵartty.
Túrkııa Respýblıkasynyń Mádenıet jáne týrızm mınıstrligi, Býrsa Mýnısıpalıteti men Túrksoı Halyqaralyq uıymynyń uıymdastyrýymen ótkizilgen «Altyn Qarakóz» folklorlyq bı baıqaýyna qatysqan «Qazyna» bı ansambline Ońtústik Qazaqstan oblysynyń ákimdigi jáne Qazaqstannyń Túrkııadaǵy Elshiligi qoldaý bildirdi. Qazaqstan Respýblıkasynyń Tuńǵysh Prezıdenti qorynyń laýreaty, QR mádenıet qaıratkeri Ájibekova Záýre Bekembaıqyzynyń jetekshiligindegi birneshe halyqaralyq, respýblıkalyq bı baıqaýlarynda jeńis tuǵyrynan kórinip, kúngeı ólkeniń ómirsheń ónerin nasıhattap júrgen bı ujymy bul saıysta da qazaqtyń ulttyq ónerin pash etti.