Beıbit zamanda qyryq jylǵa sozylǵan ıadrolyq synaqtardyń qasireti Abaı eliniń týmasy, belgili jazýshy Rollan Seısenbaevtyń nazarynan eshqashan tys qalǵan emes. Osy taqyrypqa arnalǵan onyń shyǵarmalary kóptegen shetel tilderinde de jaryq kórgenin jaqsy bilemiz. Sonyń biri «Dúnıe tas-talqan bolǵan kún» dep atalady.
Jýyrda Semeıdegi «Dostyq» úıinde jazýshynyń atalmysh hıkaıasy boıynsha jasalǵan aýdıospektakldiń tusaýkeser rásimi ótkizildi. Oǵan osyndaǵy «Boker» dep atalatyn evreı ulttyq mádenı ortalyǵy, «Jańa shyǵarmashylyq» dep atalatyn jastardyń qoǵamdyq birlestigi men «Alfa-Marıno» jarnama-aqparat agenttigi muryndyq boldy. El táýelsizdigi men Elbasy Jarlyǵymen Semeı atom polıgonynyń jabylǵanyna 20 jyl tolýyna oraı uıymdastyrylǵan ıgi sharaǵa semeılikter kóptep jınaldy.
Aýdıospektakl taspasy endi zaǵıptar qoǵamyna jiberilmek. Osyndaı ıgilikti sharalar basqa azamattardyń tarapynan da zor qoldaý taýyp jatqany qýantady. Aıtalyq, jastar men balalar qaýymdastyǵy jáne kóńildi tapqyrlar klýby múgedek balalarǵa arnalǵan qaıyrymdylyq marafonyn ótkizdi. Aksııa sońynda álgindeı jandarǵa aqshalaı jáne basqa da qaıyrymdylyq kómek kórsetildi.
Mundaı ıgi sharalardan qala kásipkerleri de syrt qalyp otyrǵan joq. Sonymen birge aýyldaǵy sharýa qojalyqtary da ıadrolyq synaq zardaptaryn basynan ótkizgen jarymjan jandarǵa qol ushyn berip, olardy otyn-sý, maldaryna qajet jem-shóppen qamtamasyz etýge kómektesýde. Kóp túkirse kól demekshi, osyndaı bereke-birlikke ne jetsin! Al kúni keshe ǵana Semeı memlekettik ýnıversıtetinde «Iаdrolyq qarýdan qutylǵanymyzǵa 20 jyl» degen taqyryppen konferensııa ótkizildi.
Dáýlet SEISENULY, Semeı.