«Iаndeks.Taksı» kompanııasynyń bas dırektory Tıgran Hýdaverdıannyń aıtýynsha birikken platforma maýsym aıynda alty eldiń 127 qalasynda quny 7,9 mıllıard rýbl bolatyn 35 mıllıon ret qyzmet kórsetken.
«2011 jyly «Iаndeks.Taksı» qurylǵaly beri servıske birneshe myń kólik júrgizýshileri tirkeldi. Biz Reseı men ózge bes el ishinde tabysqa jetken jobaǵa aınaldyq. Bul ondaǵan mıllıon adamdardyń senimine kirýge múmkindik berdi. Jumysymyzdyń Uber-men birge jalǵasýyna qýanyshtymyz», deıdi Tıgran Hýdaverdıan.
Taksı qyzmetine tapsyrys berýdi ádettegideı eki qosymsha arqyly jasaýǵa bolady. Al júrgizýshiler biryńǵaı platformaǵa birigedi. Bas dırektordyń sózinshe, bul shara kólik sanyn kóbeıtip, tapsyrys kútý ýaqytyn azaıtýǵa kómektesedi. Kompanııalar ózara roýmıngtik kelisimshartynan soń, Uber qosymshasynan «Iаndekske» jáne keri tapsyrys berýge bolady.
Uber men «Iаndeks.Taksı» ortaq kompanııaǵa 225 jáne 100 mıllıon qarjy quıǵan. Bıznestiń 59,3 paıyzy «Iаndekske», 36,6 paıyzy Uber-ge jáne 4,1 paıyzy qyzmetkerlerge tıesili bolady. Quzyrly mekemeler kelisimdi 2017 jyldyń tórtinshi toqsanynda jasap bitirýi qajet.
Sonymen qatar, jýyrda Máskeýde iske qosylǵan UberEATS tamaq jetkizý qyzmeti jańa kompanııanyń ishinde jumysyn jalǵastyrady. Endi Uber shyǵarǵan servıste «Iаndeks.Karta» tehnologııasy qoldanylady.
Resmı aqparattarǵa júginsek, «Iаndeks.Taksı» men Uber onlaın-saparlardyń tarıfteri týraly naqty keltirilmegen. Tek TJournal portalynda kompanııa ókilderiniń aıtýynsha, tarıfter qunyna aıtarlyqtaı ózgerister engizilmeıdi.
Kompanııa baspasóz qyzmetiniń habarlaýynsha, «Iаndeks.Taksı» júrgizýshileriniń sany kóbeıgendikten, qyzmet qunyn arttyrý koeffısıenti salystyrmaly túrde az qoldanylýy múmkin.
Esterińizge sala keteıik, bıyl 13 shildede «Iаndeks.Taksı» men Uber kompanııalary birigetindikterin jarııalady. Bul jańalyqtan keıin Máskeý bırjasyndaǵy «Iаndekstiń» aksııalary 20 paıyzǵa ósken.
Aqparat: Uber kompanııasy 2009 jyly qurylǵan. Qazir álemniń 470 qalasynda taralǵan. Al Qazaqstanda 2016 jyldyń maýsym aıynda iske qosylǵan.
2011 jyly qurylǵan «Iаndeks.Taksı» kompanııasy álemniń 108 qalasynda qyzmet kórsetedi. Elimizde 2016 jyldan bastap jumys istep keledi. Ázirge kompanııalar elimizdiń eki iri qalasy – Almaty men Astanada ǵana qyzmet kórsetedi.
Aıgúl Shernııaz,
«Egemen Qazaqstan»