Kórmege kelgen kópshilik mórdiń shyǵý tarıhy jáne qalyptasýy týraly mátin men Áýlıeata óńiriniń tarıhynan syr shertetin aýqymy bir ǵasyrdy qamtıtyn qujattarǵa basylǵan mór úlgilerimen tanysty. Onyń aınalasyna qazaq handarynyń mórleriniń kóshirmeleri de aıshyqtalyp, kórme mańyzyn arttyra tústi. Dóńgelek ústeldi Jambyl oblysy ákimdiginiń mádenıet, arhıvter jáne qujattama basqarmasy basshysynyń orynbasary Sara Mádıeva ashyp, júrgizip otyrdy. Sara Qabylbekqyzy óz sózinde mór memlekettik ǵana emes, jekelegen adamdardyń da tarıhy ekenin, sondaı-aq qujattardaǵy mórlerdi óńdep, kórermenniń nazarlaryna usyný úshin arnaıy jabdyqtar men mamandar qajet ekenin atap ótti. Sonymen qatar, Jambyl oblystyq ardagerler keńesiniń tóraǵasy Erkinbek Soltybaev, «Ejelgi Taraz eskertkishteri» tarıhı-mádenı qoryq-murajaıynyń dırektory Táken Moldaqynov, ardager jýrnalıst, ólketanýshy Máskeý Noqrabekov, oblystyq kıno ortalyǵynyń dırektory Nurhat Serikbaev kórme jaıly óz pikirlerimen bólisti. Al oblystyq tarıhı-ólketaný mýzeıiniń dırektory Gúlnur Emberdıeva mórlerdiń tarıhyn endigi kezekte mýzeı qyzmetkerleri de tereńirek zertteıtinin aıtyp ótti. О́z sózinde Qazaqstannyń Qurmetti jýrnalısi, ıdeıa avtory Maqulbek Rysdáýlet «Mór kórmesin ótkizý óte sırek kezdesedi. Búgingi tańda mórdiń tarıhymen sfragıstıka dep atalatyn ǵylym aınalysatyndyǵyn aıta ketkim keledi. Bul salada bizdiń elimizde de naqty jumystar kóp atqarylǵan emes. Soǵan qaramastan osy salanyń damýyna kishkentaı da bolsa úles qosý úshin arhıv qyzmetkerleri eki-úsh jyldan beri talmaı, qajymaı eńbek etti», dep kórme mórleri týraly baıandady. Oblystyq arhıv qyzmetkerleri Nazym Qojamarova men Saǵyndyq Zeınýllauly kópshilikke mórlerdi jeke-jeke tanystyryp, olardyń tarıhyn áńgimeledi.
Hamıt Esaman,
"Egemen Qazaqstan"