Qaýymdastyq quramyndaǵy 28 qalanyń 100-ge jýyq ókili men 5 halyqaralyq birlestik, 7 ǵylymı jáne saraptamalyq uıymnyń músheleri bas qosqan jıynǵa jetekshilik etken Astana qalasynyń ákimi Áset Isekeshev mundaı sessııalardyń qala basshylary úshin tájirıbe almasý men ózekti máselelerdi talqylaýda tıimdiligi mol ekendigine toqtaldy. Sondaı-aq, ol óz sózinde Shanhaı yntymaqtastyq uıymyna múshe elderdiń Merler keńesin qurý qajettigin otyrysqa qatysýshylardyń qaperine saldy.
«Búgingi jıyn arqyly biz Reseı men Qytaı, Úndistan men Ortalyq Azııa elderi arasynda ShYU-ǵa múshe memleketter qalalarynyń Merler keńesin qurý bastamasyn kóterip otyrmyz. Onyń maqsaty – saýda salasyndaǵy yntymaqtastyq pen qalalardy damytý salasyndaǵy tehnologııalarmen almasýǵa, qala qurylysy, energııa tıimdiligi, balamaly energııa kózderi, smart-tehnologııa, qoǵamdyq kólikter men elektrondy kommersııa- ny damytýǵa, ýnıversıtetter arasyndaǵy baılanystardy birizdendirýge baǵyttalady. Bul maqsattardyń barlyǵy da ShYU ıdeıasyna saı keledi», dedi Á.Isekeshev.
Onyń sózine qaraǵanda, Merler keńesi qyzmetke kirisken jaǵdaıda, ol naqty josparlar boıynsha turaqty is-áreketter júrgizetin tájirıbelik alańǵa aınalǵan qurylym bolýy tıis. Sondyqtan da, Merler keńesin qurý bastamasy búgingi tańda ózekti bolǵandyqtan, onyń jumysyn bıylǵy kúzden bastap ketýge múmkindikter de joq emes.
Eki kúnge sozylǵan alqaly jıynnyń kezekti sessııasyna jetekshilik etken «TMD-nyń ekonomıkalyq damýy iskerlik ortalyǵy» kommersııalyq emes seriktestiginiń bas dırektory Vladımır Savchenko eń aldymen halyqqa syılyq jasap, buqara qaýymdy qýantýdy Qazaqstan Prezıdentinen úırený kerek dep málimdegenin aıta keteıik.
«Osydan 25 jyl buryn Almaty qalasynda Táýelsiz Memleketter Dostastyǵyn qurý týraly shartqa qol qoıylǵanyn bárimiz bilemiz. Al búgin biz salynǵanyna nebári 19 jyl ǵana bolǵan qalada bas qosýdamyz. Bul qala Qazaqstan Prezıdentiniń ıdeıasymen jáne basshylyǵymen salyndy jáne Nursultan Ábishuly qysqa ǵana ýaqyttyń ishinde óz memleketiniń bedelin álemdik bıikke kótergen tulǵa. Sondaı-aq, Birikken Ulttar Uıy- my 29 tamyzdy jyl saıyn Iаdrolyq synaqtarǵa qarsy is-qımyldyń halyqaralyq kúni retinde atap ótetini barshamyzǵa málim. Adamzat balasy úshin ıgiligi mol osy iste de Qazaqstan Prezıdentiniń eńbegi eren. Tipti, taıaýda ǵana elimizde TMD elderiniń zııandy qaldyqtardy joıý máselelerine arnalǵan sessııasy ótkeni esimizde. Al búgin qalalardy basqarý boıynsha jańa basqarýshylyq qurylymdardy qurý, halyq úshin zamanaýı jaıly baspanalar salý máselelerin talqylaýdamyz. Biz Qazaqstan Prezıdentinen halyqqa, memleketke qalaı syılyq jasaýǵa bolatynyn úırenýimiz kerek», dedi V.Savchenko.
Sonymen qatar, «Qalanyń turaqtylyǵyn qamtamasyz etý úshin aqyldy tehnologııalardy engizý» jáne «Zamanaýı ýrbanızasııa jaǵdaıynda kólik júıesin basqarý» syndy taqyryptyq seksııalarmen jalǵasqan jıynda elorda ákimdigi Astanada boı kóterip jatqan jańa akvapark pen saýda, oıyn-saýyq ortalyǵynyń jobasyn jurtshylyqqa tanystyrdy. О́ziniń sózinde Á.Isekeshev «Sıtı Palas» dep atalatyn kópbeıindi saýda, oıyn-saýyq ortalyǵynyń qurylysy qalanyń oń jaǵalaýynda salynyp jatqanyn tilge tıek etti.
«Bul ǵımarat Respýblıka dańǵyly men A.Imanov kóshesiniń qıylysynda ornalasqan. Sondaı-aq, «Nurly jol» gúlzarynyń boıynda «Kerýen-2» saýda, oıyn-saýyq ortalyǵyn salyp, jańa akvaparktiń qurylysyn Qazaq eli alańy aýdanynda júrgizý josparlanyp otyr», dedi ol. Aıta keteıik, 1998 jyldyń 3 qyrkúıeginen beri qyzmet etip kele jatqan qaýymdastyq TMD-nyń 9 memleketindegi 19 iri qala ákimdikteriniń bastamasymen qurylǵan bolatyn. Búginde uıym quramyna 87 qala qabyldanǵan bolsa, oǵan Qazaqstannyń 9 qalasy kiredi.
Nurlybek DOSYBAI, «Egemen Qazaqstan»