Túrkııanyń Qazaqstandaǵy Tótenshe jáne ókiletti elshisi, dıplomatııalyq korpýs ókilderi men sheteldik jáne qazaqstandyq BAQ qyzmetkerleri qatysqan jıynda baýyrlas elder arasynda ornaǵan berik senim men qos memleket basshylarynyń tereń áriptestigi keńinen sóz boldy.
Basqosý barysynda Túrkııa elshisi Nevzat Ýıanyk ótken jyldyń shildesinde oryn alǵan óz elindegi keleńsizdikten keıin Túrkııaǵa shet memleketter basshylarynyń arasynda birinshi bolyp Prezıdent N.Nazarbaev at basyn burǵanyn erekshe atap ótti.
«Túrkııada bolǵan tóńkeris áreketinen keıin bizdiń elimizge memleket basshysy deńgeıindegi alǵashqy sapardy Qazaqstan Respýblıkasynyń Prezıdenti Nursultan Nazarbaev jasady. Túrkııa memleketi men túrik halqy Prezıdent N.Nazarbaevtyń baýyrlas el Qazaqstannyń kórsetken tilektestigin eshqashan umytpaıdy. Sondaı-aq, biz mundaı aq adal nıettestik pen izgi áreketke árqashan qurmetpen qaraımyz», dedi ol.
Esterińizge sala keteıik, 2016 jyldyń 15 shildesinde bolǵan oqıǵalar, Túrkııa demokratııalyq júıesi men konstıtýsııalyq qurylymyna qarsy tóńkeris jasaý áreketi edi. Oqıǵa saldarynan 250 beıbit azamat sheıit bolyp, 2 195 kisi jaralandy.
Nurlybek DOSYBAI, «Egemen Qazaqstan»