Mundaǵy qoqys jáshikteriniń erekshelikteri bar. Mysaly, keıbiri kúnnen qýat alyp, qoqysqa lyq tolǵan kezde arnaıy basqarý tetigine habar beredi. Qaldyqqa tolǵan 100 lıtrlik konteınerdiń dorbasy kúnine birneshe márte aýystyrylady eken. Kórme alańynda mundaı jáshikterdiń 4 túri qoıylǵan. Barlyǵy 3 bólikten turady. Al oǵan tańnan keshke deıin arnaıy jumysshylar jaýap beredi. «Men kúndelikti saǵat 08:30-da jumys ornymda bolamyn. Kıimimdi aýystyryp alǵan soń, jumysqa kirisemiz. Qoqys jáshigi úsh bólikke bólinip, úsh tilde jazylyp-kórsetilgen. Qaǵaz, plastık jáne túrli qoqystar», deıdi tazalyqqa jaýapty jumysshy Rýslan Asylbekov.
Kórme aýmaǵyndaǵy tazalyqty saqtaý úshin arnaıy qaldyq basqarý júıesi qurylǵan. Iаǵnı, qoqys konteınerinen bastap júk kóligine deıin bir tetikpen basqarylady. Bas operasııalyq ortalyqta ornalasqan pýltke habar jetken soń, jınalǵan qaldyqtar tıisti oryndarǵa jetkizilip, qattalady. Olardyń keıbiri qaıta óńdeýge jiberiledi. Servıstik qamtamasyz etý departamentiniń dırektory Dıas Ázbergenovtiń aıtýynsha, kórme alańynan shyǵarylatyn qoqystar qattalǵan soń, qalalyq polıgonga jiberiledi. Al qaǵaz jáne plastık qoqystar qaıta óńdeýge baǵyttalady. «Qalashyqta tazalyq tolyq saqtalǵan. Osylaısha, tazalyq mádenıetin qalyptastyrýdamyz. Kórme aýmaǵyna 1600-den astam qoqys jáshigi men qattama konteıneri qoıylǵan. Kúnine birneshe myńdaǵan adam kirip-shyǵatyn shaǵyn aýmaqtyń tazalyǵy, tipti eriktilerdiń de nazarynda», deıdi ol.