Qazaqstan halqy Assambleıasynyń «Rýhanı jańǵyrý» baǵdarlamasyn iske asyrý boıynsha ótkizgen respýblıkalyq semınar Taldyqorǵan qalasyndaǵy Til saraıynda ótti. Semınardyń moderatory oblys ákiminiń orynbasary Jaqsylyq Omar Jetisý jerine kelgen qonaqtardy quttyqtap, jurtshylyqtyń atynan alǵys bildirdi. Qazaqstan Halqy Assambleıasy men Almaty oblystyq ákimdiginiń birlese uıymdastyrýymen ótip otyrǵan keń kólemdi sharanyń mańyzy joǵary. Sebebi:
– Tájirıbe almasyp, istiń nátıjeli, eńbektiń ónimdi bolýy úshin osyndaı semınardyń qajettiligi barlyǵymyzǵa belgili. Negizgi maqsat-múddemiz – Elbasynyń maqalasyndaǵy kórsetilgen dúnıelerdi iske asyryp, sony eldiń arasynda keńinen nasıhattaý. Sondyqtan búgingi mańyzdy sharany Jetisýdyń júregi Taldyqorǵan qalasynda ótkizýge sheshim qabyldaǵan Darhan Qamzabekuly, sizge alǵys aıtamyz, – dedi Jaqsylyq Omar óz sózinde.
Qazaqstan halqy Assambleıasy Tóraǵasynyń orynbasary, Hatshylyq meńgerýshi Darhan Myńbaı atalmysh sharanyń kıeli ólkede, jaqsy ortada uıymdastyrylyp jatqanyna qýanyshty ekenin aıtty. Elbasy maqalasynda usynylǵan basym baǵyttarǵa sáıkes Respýblıka kóleminde atqarylyp jatqan jumystarmen tanystyrdy. Aıtýynsha, ásirese, «Týǵan jer» baǵdarlamasy halyq ishinde úlken qoldaýǵa ıe bolyp, ıgi ister nátıjesin berip te úlgergen. Mundaı qoldaýlar aldaǵy ýaqytta da qarqynyn kemitpeıdi.
- Búginde Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgen máseleler qoǵamda qyzý talqylanýda. Alda turǵan negizgi maqsat – maqalada kórsetilgen jobalar men baǵdarlamalardy tıimdi, ári sapaly júzege asyrýdy uıymdastyrý. Semınardyń dittegeni de osy, – dedi Darhan Myńbaı.
QHA músheleri, memlekettik organdar men etnomádenı birlestik ókilderi, «Qoǵamdyq kelisim» mekemeleriniń qyzmetkerleri qatysqan semınar barysynda maqalada kórsetilgen «Qazaqstandaǵy 100 jańa esim», «Qazaqstannyń kıeli jerleriniń geografııasy» jobasy men «Týǵan jer» baǵdarlamasyn iske asýyna, ǵylymı-ádistemelik qoldaý kórsetý maqsatynda atqarylyp jatqan sharýalar men aldaǵy ýaqytta uıymdastyrylmaq jobalar tanystyryldy. «Novye reshenıe» bilim qorynyń jetekshisi Vıacheslav Kım «Qazaqstandaǵy mádenı mura» jobasyn usyndy. Al, QHA ǵylymı-sarapshylyq keńesiniń múshesi, L. N. Gýmılev atyndaǵy Eýrazııa ulttyq ýnıversıtetiniń professory Nurbek Shaıahmetov «Týǵan jer» baǵdarlamasyn júzege asyrýdaǵy etnomádenı birlestikterdiń áleýeti» taqyrybynda oı qozǵady. Astana qalasyndaǵy ózbek etnomádenı birlestiginiń jetekshisi, Rýhanı jańǵyrý boıynsha ulttyq komıssııanyń múshesi, kásibı moderator Sherzod Pýlatov «Medıasııa jańasha oılaýdy qalyptastyrý tásili retinde», Jezqazǵan qalalyq máslıhatynyń depýtaty, ári Qoǵamdyq kelisim keńesteri qyzmetiniń tóraǵasy, bilim mesenaty Bekzat Altynbekov «Rýhanı jańǵyrý baǵdarlamasyn iske asyrýdaǵy Qoǵamdyq kelisim keńesteri qyzmetiniń jańasha qaǵıdattary» taqyrybynda dáris oqydy.
Arnaıy baıandamashylar usynǵan taqyryptar boıynsha erkin áńgime órbitken semınarǵa qatysýshylar da óz tarapynan usynystar men oılar aıtty. Ásirese, «Qazaqstandaǵy 100 jańa esim» jobasyn júzege asyrý boıynsha enomádenı birlestikter men óńirlik «Qoǵamdyq kelisim» mekemeleri ókilderiniń qatysýyndaǵy dıalog alańy qatysýshylar tarapynan qyzý talqylandy. Semınar aıasynda uıymdastyrylǵan «Dinı ekstremızmniń aldyn alý», «Zamanaýı bıznes úlgi jasaý» atty trenıngter de qatysýshylar úshin paıdaly bolǵany anyq. Sebebi, sońǵy atalǵan eki taqyryp ta búgingi kúni mańyzdy máseleler ekeni aıan. Qarapaıym azamattardan bastap bılik ókilderine deıin bilýge tıis qaǵıdalar men ustanymdar ár sát saıyn eske salynyp otyrýǵa tıis.
Semınar sheńberinde oblysymyzda atqarylyp jatqan jumystarǵa da baǵa berilip, aldaǵy ýaqytta atalǵan taqyryptar boıynsha ózge óńirlermen birlese qyzmet etý, tájirıbe almasý týraly da usynystar aıtyldy.
Semınarǵa kelgen qonaqtardyń Jetisý ólkesine sapary munymen bitpeıdi. Alda Kerbulaq aýdanyndaǵy Sh. Ýálıhanov atyndaǵy «Altyn emel» memlekettik memorıaldyq mýzeıinen bastap, birneshe tarıhı mańyzy bar nysandardy aralamaq.
Almas NÚSIP,
«Egemen Qazaqstan»
Almaty oblysy
Sýretti túsirgen Jumabaı MUSABEK